Paamiuni ineriartortitsinermut illu nutaaq Paamiormiut isumaannut katersuuffiussasoq

Paamiuni nutaaliornermut illu nutaaq ammarneqarpoq.

Illu innuttaasut ‘nammineq isumassarsiaminnik suliaminnillu suliaqarfigisinnaassavaat, piginnaanitik ineriartortillugit immikkullu ilinniarlutik’.

Kommuneqarfik Sermersooq tusagassiuutinut nalunaarummi taama allappoq:

- Paamiuni ineriartortitsinermut illu maanna ammarneqarpoq. Illu innuttaasut isumassarsiaannut, nutaaliornerannut, tunisassiornermut inuussutissarsiornermilu periarfissanik ineriartortitsinissamut siunissami atorneqassaaq.

Kommunalbestyrelsip illu B-106 'Mikisoq'-p pisiarinissaanik aalajangernerata kingorna Paamiuni nutaamik ineriartortitsinissamut avatangiiseqalernissamut tunngavissaq pilersinneqarpoq. 

Nuummi Illorput Paamiuni ineriartortitsinermut illuliornissamut isumassarsiorfiusimasoq, kommune allappoq. Kommune illumi atortussaqartitsissaaq, innuttaasulli namminneq suliassaminnik pilersitsissapput.  

Inuussutissarsiornermut takutitsiffiussasoq

Illu ineriartortitsivik nutaaq ammerinissamut, mersornissamut assassoriaatsinillu allanik suliaqarnissamut periarfissaqartitsissaaq.

- Illu najukkami tunisassiortut saqqummersitsinissamut tuniniaanissamullu tamanna ilutigalugu atorsinnaajumaaraat, Kommuneqarfik Sermersooq tusagassiuutinut nalunaarummi allappoq:

- Isumassarsianik piviusunngortitsinissamut avatangiisiliornissaq, isumassarsiarineqartut tunisassiarineqarnissaannut siunissamilu namminersorluni inuussutissarsiuteqarnissamut tunngaviliinissaq siunertarineqarpoq.

Kommunip inuussutissarsiornermut immikkoortortaqarfiata illu nutaaq, aallarniisunut innuttaasunullu allanut inuussutissarsiornermut soqutiginnittunut sammisassaqartitsinermut tamatuma saniatigut atussavaa.