Naalakkersuisut akuerineqartut
Inatsisartut Kim Kielsenip Naalakkersuisuni siulittaasunngoqqinnissaa nalunaaqutaq ataasinngunngitsiartoq akueraat. Tamanna Inatsisartut immikkut ittumik ataatsimiinneranni pivoq.
Kim Kielsenip toqqarneqareernerani Naalakkersuisut sinneri immikkoortumi ataatsimut akuersissutigineqarput. Inassutigineqartut malinneqarput Naalakkersuisunngortullu paasissutissanik allattuiffimmi allattorsimapput:
Naalakkersuisuni ilaasortat amerlanerpaat, Kim Kielsen minillugu, Inatsisartunit sulinngiffeqarnissaminnik erngerlutik qinnuteqarput. Anton Frederiksen Naalakkersuisuni aamma ilaasortaavoq, Inatsisartunulli qinigaannginnami sulinngiffeqarnissamik qinnuteqanngilaq.
AAMMA ATUARUK Aleqa Inatsisartuniililersoq
Naalakkersuisut siulittaasorisimasaat, Aleqa Hammond sulinngiffeqarniarlutik qinnuteqartut pissutigalugit Inatsisartunut isertut ilagaat.
Taanna Nunatta Qitornaasa siulittaasuanut, Vittus Qujaukitsumut aatsitassanut, suliffeqarnermut nunamullu namminermut naalakkersuisunngortumut, sinniisussaavoq.
Naalakkersuisunngortut aajuku:
- Kim Kielsen, Siumut, Naalakkersuisut Siulittaasuat. Aamma Pinngortitamut Avatangiisinullu Naalakkersuisoqarfik
- Simon Simonsen, Siumut, Ineqarnermut Attaveqaqatigiinnermullu Naalakkersuisoq
- Pele Broberg, Partii Naleraq, Aningaasaqarnermut Naalakkersuisoq
- Vittus Qujaukitsoq, Nunatta Qitornai, Aatsitassanut, Suliffeqarnermut Nunamullu Namminermut Naalakkersuisoq
- Doris Jakobsen Jensen, Siumut, Peqqissutsimut Ilisimatusarnermullu Naalakkersuisoq
- Erik Jensen, Siumut, Aalisarnermut, Piniarnermut Nunalerinermullu Naalakkersuisoq
- Vivian Motzfeldt, Siumut, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq
- Aqqalu Jerimiassen, Atassut, Inuussutissarsiornermut Nukissiuuteqarnermullu Naalakkersuisoq
- Anthon Frederiksen, Partii Naleraq, Isumaginninnermut Inatsisinillu Atuutsitsinermut Naalakkersuisoq
