Aleqa Inatsisartuniililersoq

Naak Aleqa Hammond Inatsisartunut qinersinermi qinersisikikkaluarluni ataatsimiittarfimmi issiavissaqalerpoq.

Nunatta Qitornaasa siulittaasuat, Vittus Qujaukitsoq qinersinermi 698-init taaguunneqarami Siumut, Partii Naleraq Nunatta Qitornaasalu naalakkersuisooqatigiilernerani naalakkersuisunngussaaq. Naalakkersuisutullu ivertinneqaruni Inatsisartunit sulinngiffeqarnissani KNR-imut uppernarsarpaa.

AAMMA ATUARUK Danskit naalakkersuisuisa Aleqa naatsorsuutigaat

Inissarlu taanna Nunatta Qitornaani taaguunneqarnerpaat tullianut tassa Aleqa Hammondimut 171-init taaguunneqartumut tunniunneqarpoq, taassumalu Vittus Qujaukitsoq Inatsisartuni taarsissavaa.

AAMMA ATUARUK Aleqap Nunatta Qitornai qaammammut 75.000 koruunnik pissarsissuppai

Arlariinnik atuuffeqarnermit akissarsiassat marloqiusaasut

Aleqa Hammond 2015-imiilli Folketingimi ilaasortaalerpoq. Siullermit Siumut sinnerlugu ilaasortaaqqaariarluni attaviitsutut inissisimalerpoq, maannalu Nunatta Qitornai sinnerlugit Inatsisartunut qinersinerup kingornatigut ilaasortaalerluni.

Hammondip inatsisartuni marlunni atuuffeqarnini danskit qinersinermut inatsisaat Namminersorlutik Oqartussallu inatsisaat naapertorlugit arlariinnik aningaasarsiaqaatigissavaa.

AAMMA ATUARUK Aaja Chemnitz marlunnik ilaasortaaffeqarnermini millionit sinnerlugit isertitaqalissaaq

Folketingimi ilaasortat akileraarusiinnginnermi ukiumut 638.351 koruuninik akissarsiaqartarput saniatigullu Atlantikup avannarpasissuanit qinikkat ukiumut 81.312 koruuninik tapiissuteqarfigineqartarlutik.

Tassalu Folketingimit ukiumut isertitai katillugit 719.663 koruuniupput.

Taakku saniatigut Hammondip Inatsisartunit akileraarusiinnginnermi qaammammut 41.854 koruunit akissarsiarilissavai. Akissarsiassat katillugit akileraarusiinnginnermi ukiumut på 1.215.911 koruuniupput.