Aleqap Nunatta Qitornai qaammammut 75.000 koruunnik pissarsissuppai
Partii marlunngornermi naammattunik taaneqarluni Inatsisartuni ilaasortaatitaqalerpoq. Aleqa Hammond facebookimini pingasunngornermi taama allaaserisaqarpoq.
Folketingimi attaviittuujunnaarluni partiimut sinniisaalernera parteertaavanut aallarteqqammisumut Nunatta Qitornaanut aningaasatigut iluaqutaassagunarput.
Folketingimi aqutsisoqarfik KNR-imut nalunaarpoq, Nunatta Qitornai tapisisalerumaartut soorlu Folketingimi Inuit Ataqatigiit taama pisartut.
Tamatuma inerneraa Partii Nunatta Qitornai gruppimut qaammatikkaartumik koruunit 74.963-it tapiissutisiarisalissagai.
AAMMA ATUARUK Danskit partiimut tapiissutaat Siumup pisartagariinnassavai
Foketingimi ilaasortatut Aleqa Hammond 47.013 koruuninik taperneqartarpoq, immikkullu ilisimasalinnut sulisitanut 18.692 koruunisisarluni. Gruppimut tapiissutip qaavatigut kisitsisit taakku marluk ilanngukkaanni partii qaammatit tamaasa Folketingimi sulinissamut, sulisitanut aningaasartuutinullu allanut akissaqarluassaaq.
Partiilli naatsorsuutigisinnaanngilaa partiitut toqqaannartumik tapiiffigineqarnissani, tassanimi ilaasortat pinnagit partiip aaqqissuussaanera pineqartarmat.
Eqqaamaneqartutut Aleqa Hammond Siumut sinnerlugu Folketingimi 2015-imi ilaasortanngorpoq.
Foketingilli aningaasanik tigusissutaa 2016-imi imminut atugassaminut atornerlukkamiuk partiiminit anisitaavoq. Taamaattumik partiimut tapiissut suli Siumumut ingerlatinneqartarpoq.
