Naalakkersuisoq: Sipaaraluarluta sanaartornikinnerulissanngilagut
- Covid 19-ip isumagineqarneranut naammattusaarinerput sanaartugassanillu agguataarisimanerput aqutsinerlunnermik ersersitsinngilaq, Aningaasaqarnermut naalakkersuisoq Vittus Qujaukitsoq oqarpoq.
Sanaartugassanut aningaasaliissutit ilanngarniarneqarnerat Inatsisartut sanaartornermut ataatsimiititaliaanni ilaasortamit, Aqqaluaq B. Egedemit isornartorsiorneqarpoq.
AAMMA ATUARUK Naalakkersuisut sanaartugassanut sipaarniartut
Sipaarniarneq nunarsuaq tamakkerlugu tunillaassuuttumik nappaalasoqaneranik peqquteqartoq aningaasaqarnemut naalakkersuisoq oqarpoq.
Sanaartornerit ikilissanngitsut
2022-imiit 2024-p tungaanut sanaartugassanut aningaasaliissutinik ilannngaasoqaraluarpalluunnit sanaartukkat ikilissanngitsut taassuma aamma erseqqisaatigaa.
- Pappilissatigut ikileriaateqaraluartut kisianni inuiaqatigiinni naluneqanngitsumik amerlasuunik aningaasalersuiffigineqarlutik mittarfissuit, erngup nukiganik nukiliorfissat, inissianik iluarsartuussinerit sanaartornissallu eqqarsaatingalugit inuiaqatigiinnut sanaartugassat ukiuni tulliuttuni annikillisussaanngillat akerlianik annertuseriangaatsiartussaapput, Vittus Qujaukitsoq oqarpoq.
- 2021 missingersuutit akinut nalimmassarneqassanngillat – 306,7 mio. kr.
- Allaffissornikkut sipaarniutit annertuut atugassanngortinneqassapput – 111,9 mio. kr.
- Pinngitsoornani qarasaasiakkut allakkerivimmut ilaanissaq atulissaaq – 18,3 mio. kr.
- Pinngitsoornani soraarnerussutisiaqalernissamut katersisarnerup atulersikkiartornera sivitsorneqassaaq – 97,2 mio. kr.
- KNI-mut sullissinissamik isumaqatigiissutinut akiliutit nungukkiartortinneqassapput – 24,0 mio. kr.
- Nukissiorfiit annikitsumik pisariillisaanissamut peqquneqassapput – 10,0 mio. kr.
- Sanaartugassanut sinaakkutit annikillineqarput – 85,0 mio. kr.
Tusarfik: Naalakkersuisut.
Naalakkersuisut 2021-iminngaanniit 2024-imut 650 millionit koruunit sipaarneqarnissaat siunnersuutigaat. Aningaasanut taakkununnga sanaartugassanut aningaasaliissutit 85 millionit koruuninik ilanngarneqarnerat ilaavoq.
-Sipaarniutit assigiinngitsorpassuit aningaasanut inatsit aqqutingalugu ukiut sisamat iluanni 650 millionit missaanni aningaasartaqartut nassaariniartariaqarsimavagut, Vittus Qujaukitsoq oqarpoq.
