Thailandip inuit 100.000-t killeqarfimmiit qimagussortissimallugit nalunaarutigigaa

Thailandimi innuttaasut 100.000-init ikinnerunngitsut Cambodjap killeqarfiani najugaqartut, ukiut qulikkuutaat angullugit sorsuuffiunngereersut, innuttaasui ulluni kingullerni sakkortuumik sorsuuffioqqilerneranik aallaaveqartumik, nunami oqartussaasa qimagussortippaat.

Nutaarsiassaqartitsivik AFP naapertorlugu Thailandip nunamut imminermut ministereqarfia paasissutissiivoq.

Ministeriaqarfik naapertorlugu inuit 100.672-t killeqarfinniit sisamaniit isumannaatsunut soorlu qaartartunit eqqorneqatsaaliorluni qimaaffissalianut betoniusunut nuussorneqarput.

Peqqinnissamut ministeriaqarfiup toqutaasut 14-inut amerleriarsimasut paasissutissiissutigaa. 

Cambodjamit Thailandimiillu sakkutuuinut qaartartunik eqqaassisoqartoq, qallunaat nalunaaqutaat malillugu sisamanngornermi ullaaralaakkut nalunaaruteqarput. 

Naalaffissuup Ta Moan Thomip sumiiffigisaani killeqarfimmi saqitsaaffiusup eqqaani, nunat taakku saassusseqqaartutut imminnut pasillertaapput. 

Kingorna Thailandi timmisartumik malersuummik sumiiffimmukartitsivoq, aqqusinermullu qaartartut marluk nakkartinneqarlutik.

Aporaannermi ikinnerpaamik Cambodjamiu sakkutuujunngitsoq ataaseq toqutaavoq, tallimallu allat ikiligaallutik, nutaarsiassaqartitsivik Reuters naapertorlugu taamak Cambodjamiu oqaaseqartartoq paasissutissiivoq.

Immitsinnut illersortariaqarsimavugut

Oddar Meanche provinsip avannaata kitaaneersut ilaqutariit Cambodjamiut 1500-t qimagussortinneqarsimasuttaaq allaqqavoq.

Qallunaat nalunaaqutaat malillugu tallimanngornermut unnuaani Cambodjami ministeriuneq Hun Manet, pisoq pillugu FN-ip Isumannaallisaanermut Siunnersuisartuinut immikkut ittumik ataatsimeeqatiginissaannut noqqaassuteqartariaqalersippaa. Ataatsimiinnissaq Kalaallit Nunaata nalunaaquitaa malillugu tallimannngornermi arfinernut pissasoq naatsorsuutigineqarpoq.

Taassuma pisoq pissutissaqanngitsumik piaarinaatsoornerunngitsumillu sakkutuulersorluni saassussinertut taagaa, Reuters allappoq.

Reuters naapertorlugu, Thailandip ministeriunerigallagaata Phumtham Wechayachaip Cambodja pissaanermik atuinerarlugu assuarlerpaa. 

- Eqqissisimasumik aaqqiissutissanik suliniuteqarnissaq suli pisussaaffigaarput, aamma isumaqatiginninniartoqartariaqarpoq, kisianni pisoq perulluliortitsiniarneruvoq, taamaattumillu immitsinnut illersortariaqarsimavugut, tusagassiortunut sisamannngornermi taamak oqarpoq.

/ritzau/