Angajoqqaaq inuusuttoq Kullorsuarmiu: Inissiassat marluk naammanngillat

Kullorsuarmi inuusuttunut inissianik marlunnik sanaartornissamik Naalakkersuisut pilersaaruteqarput. Inuusuttunut angajoqqaaminni najugaqartunut naleqquttuunersut, Miina Olsenip apeqquserpaa.

Allattoq Miki Fleischer

juulip 24-at 2025 15:03

Kullorsuarmi inuusuttunut inissaaleqineq annikillisarniarlugu, ataatsimik initalinnik marlunnik inissianik sanaartortoqarniarpoq.

– Amerlanerusinnaagaluarput. Maani innuttaasut 500-t tungaanut amerlassuseqarput, inissaaleqisorpassuullutillu. Inersimasunngoreeraluarlutik meeraqarunik ilaqutariit illoqatigiillutik amerlavallaartarlutik, Miina Olsen oqarpoq.

Kullorsuarmi nalinginnaasumik ilaqutariit kinguaariit arlallit ataatsimoorlutik najugaqartarput. Miina Olsen aamma ilaquttaminik najugaqarteqarpoq.

Meeqqani marluk aappanilu namminneq initaarnissaatik kissaatigaa.

Inuusuttunut inissianut najoqqutassiaq pillugu

Inissiat ataatsimik initalinni inuusuttut nammineq inoqarfinni minnerni ineqalernissaat siunertaralugu suliarineqarpoq.

Inuusuttunut inissiat arlallit Kalaallit Nunaata illoqarfinni nunaqarfinnilu isorliunerusuni 2023-ip matuma siornali sanaartorneqarput.

Inuusuttunut inissiat, assigiissaartutut najoqqutassami ilaatillugu, ineriartortinneqarput, tassani aallaavigineqarluni inissiat inoqarfinni minnerusuni sananeqarnissaat pisariitsuussasoq, aammalu piujuartitsinissaq pitsaassuseqartitsinissarlu pillugit pingaarnertigut takorluukkanut naapertuutissasoq, tassani aningaasaqarnerup, avatangiisit, silap pissusaata inooqatigiinnerullu oqimaaqatigiinnissaat eqqarsaatigineqarluni.

Suliassaq inuusuttup nammineerluni najugaqarnissamut ikiorneqarluni inersimasunngornissamut inuusuttup alloriarfissaatut eqqarsaatigineqarpoq. Iserternermi attartortussap inissinnialernermini aningaasartuutissai annikinnerpaaffimmiisinniarlugit, inuusuttup alloriarnissaa ajornannginnerulersinniarlugu inissiat tamarmik aamma assigiissaakkanik pequtilersugaassapput.

Tugisiffik: Naalakkersuisut

Allisiguk

Takornartaanngilaq

Miina Olsen, 25-nik ukioqartoq, aappani meeqqanilu marluk, angajoqqaani qatanngutinilu najugaqatigai.

Ilaqutariit arfineq-pingasut illumi ataatsimi najugaqarput.

Ilaqutariinngorlaat taama pissutsini inuunerat Kullorsuarmi takornartaanngitsoq, Miina Olsen-ip oqaluttuaraa,

Taamatut ilaqutariittut ataatsimoorluni najugaqarneq Kullorsuarmi nalinginnaasoq, Miina Olsen oqaluttuarpoq.

– Maani nalinginnaasarpoq meerallit ikinnerpaamik arfinillit imaluunniit arfineq-marluk ataatsimoorlutik najugaqartarnerat. Ilaatigut inersimasut meeraqanngikkaluarlutik suli angajoqqaaminni najugaqartarput, taanna oqarpoq.

Qangali ajornartorsiutaasoq

Nunaqarfimmi inissaaleqineq ukiut arlallit ingerlaneranni ajornartorsiutaasimavoq.1980-ikkunnili Kullorsuarmi innuttaasut amerliartorput.

Innuttaasut amerliartornerat taamaallaat annikitsumik allanngorsimavoq, aammalu ineriartortitsinermi tassani ingerlaannarnissaa ukiuni tulliuttuni naatsorsuutigineqartoq, Avannaata Kommuniata nittartagaani allassimavoq.

Issanngusarneq

Angerlarsimaffimmi kisimiiffissaqarani Miina Olsen-itut ilaquttanik illoqateqaraanni issanngunartarpoq,

-Angerlarsimaffipput qaliaqarpoq marlunnik sinittarfilik. Anaanakkut nukarlersarpullu ineqatigiipput taava sinittarfiup aappaani qatanngutiga. Taava uanga meeqqakkalu inimi unnukkut sinittarpugut, siniffiliorluta.

- Ajortanngilaq. Kisianni ilaanni qasunarsisarpoq inoqaannavittoq kisimiissinnaanata, anaanakkunnut pulaartut immaqaluunniit inuusuttortatta kammai pulaartut, taava eqqissisimaarpiarsinnaanata ullormut, kisimiissinnaanata. Nammineerusuleqqanalaraluarpoq.

Isumaalu naapertorlugu, imigassartortoqaleraangat peqqinnartarani,

- Inuusuttut ilai imertarput, angajoqqaat imertarput. Peqqinnartuunngilaq taama sivisuumik angerlarsimaffeqatigalugit ilaqutariippassuulluni, Miina Olsen oqarpoq.

Inissiat marluk piareerpata, taakkunani arlaanni inissarsisinnaanissani kissaatigaa,

- Allagaqarnikuugaluarama kommunemut, taava socialimut. Meeraqarama tukummanneqarsinnaanerlunga. Kisianni taama iliuinnarsinnaannginnamik maani inissaateqannginnamik kommuneminngaanniit, Miina Olsen oqarpoq.

Kullorsuarmi inuusuttut meerallit inissaaleqisut amerlammata taakku inissiat marluk sananeqartussat naammannersut taamaammat qularnarpoq.

Kullorsuaq ilanngullugu Qasigiannguini aamma Narsami inuusuttunut inissialiornissaq Naalakkersuisut pilersaarutigaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.