FN: Silap pissusiata allanngoriartorneranit eqqugaasut taarsiivigineqarsinnaapput

Nunat silaannaap allanngoriartorneranut tunngatillugu pisussaaffimminnik unioqqutitsisut taarsiissuteqarnissamut pisussaatinneqarsinnaasut, FN-ip eqqartuussivissuata naluaarutigaa.

Tamakkuupput Haagimi, Hollandimiittoq Nunat Tamalaat Eqqartuussivianni (ICJ) nalunaarutigineqartut, Nutaarsiassaqartitsivik AFP taama allappoq.

Nunat tamarmik silaannaap allanngoriartorneranut tunngatillugu suut akisussaaffiginerai pillugu nalunaaruteqarluni, FN-ip eqqartuussivia siullerpaameerluni taamaaliorpoq.

Uppernarsaatinik naammattunik peqquteqartumik paasinarsisimappat, taarsiissutissaq pisariaqalersinnaavoq, eqqartuussiviup oqaatigaa.

Eqqunngitsumik iliortut

Silap pissusianut tunngatillugu nunat pisussaaffimminnik malinnissimanngitsut aamma “eqqunngitsmik iliortutut” isigineqartut, eqqartuussivimmit isumaqarput.

Nalunaarut siunnersuutaasumik oqaaseqaataavoq, taamaattumik aalajangiisuunngilaq. Kisianni AFP naapertorlugu, ileqqorissaarnermut aammalu inatsisitigut annertuunik pingaaruteqassaaq.

ICJ – tassa FN-ip eqqartuussiviata qullersaa – siunnersuutaasunik oqaaseqaatinik saniatigut aamma eqqartuussutinik aalajangiisuusinnaavoq, taakkulu malinneqartussaasarlutik.

Eqqartuussivik apeqqutinut marlunnut akissuteqassaaq:

Nunarsuarmioqatigiinni inatsisit naapertorlugit silaannaq gassinik kissatsitsisartunut illersorniarlugu nunat qanoq pisussaaffeqarpat?

Naalagaaffinnut silaannaap allanngoriartorneranut aammalu avatangiisinut allanut ajoqusiisimasunut inatsisit naapertorlugit qanoq kinguneqartitsisoqartassava?

Apeqqut kingulleq nunanut mikisunut, silaannaap allanngorneranit eqqorneqarsimasunut tunngavoq.

Allanngorfik

Greenpeaceimi inatsisitigut siunnersortip, Danilo Garrido, aalajangiineq "silap allanngoriartorneranut naapertuilluartumik allanngorfik"-mik taallugu oqaatigaa.

–  Pisuussutiginagu sakkortuumik eqqugaasut pillugit, eqqartuussinissamut periarfissanik nutaanik ammaassivoq, Greenpeacemit Danilo Garrido oqarpoq.

Vanuatu – kangiani qeqertaq nunaqarfeeqqallu amerlasuut ataatsimoortut – ICJ-mut siunnersuuteqarluni aalajangiinissamut apeqquteqaqqusivoq.

Vanuatumi avatangiisinut naalakkersuisoq Ralph Regenvanu eqqartuussiviup aalajangiinera nunannaarutigaa.

– Tassa silap allanngoriartorneranut suliaqarnermi killiffik pingaarutilik,  AFP naapertorlugu taanna oqarpoq.

Vanuatu aammalu kangiani nunat allat arlalissuit silap allanngoriartorneranit pissuteqartumik immap qaffariartorneranit sakkortuumik eqqugaasinnaapput.