Naalakkersuisut sanaartugassanut sipaarniartut
Naalakkersuisut aappaagumut aningaasanut inatsissatut siunnersuumminni 2022-imiit 2024-p tungaanut sanaartornermut aningaasaliissutissanut sinaakkutinit 85 millioninik sipaarusupput. Tamanna corona virusip ajornartoortitsineranik peqquteqartoq, Vittus Qujaukitsoq aningaasanut inatsisissatut siunnersuummik saqqummiinermini oqarpoq.
2021: 464,8 millionit koruunit.
2022: 439,8 millionit koruunit.
2023: 406,8 millionit koruunit.
2024: 406,8 millionit koruunit.
Tusarfik: Naalakkersuisut.
Taanna Inuit Ataqatigiit isumaqatiginngilluinnarpaat.
- Suliffeqarfiit nunatta avataaneersut sanaartornermi suliassarpassuarnik tuniorarneqarnikuupput. Tamanna nunatsinni suliffeqarfiit coronap nalaani unammilligassaqareersut pillarneqarnerannik kinguneqartariaqanngilaq, sanaartornermut ataatsimiititaliami ilaasortaq Aqqaluaq B. Egede oqarpoq nangillunilu:
- Naalakkersuinerlunneq nunatsinni suliffeqarfiit nammattariaqanngilaat, Aqqaluaq B. Egede oqarpoq.
Demokraatit akuersaartut
Partii Naalakkersuisoqataasut, Demokraatit, sanaartornermut ataatsimiititaliami siulittaasuutitaata sipaarniarneq akisussassusilittut nalilerpaa.
- Nunarsuarmi aningaasarliornermut tamatta akisussaasariaqarpugut. Kommunet tamarmik taamaalioreerput, Inatsisartut Naalakkersuisullu taamaaliorniarnerat pissusissamisoortuuvoq. Taamaaliorneq akisussaassusilittut nalilerpara, Justus Hansen oqarpoq.
Aningaasanik taama amerlatigisunik sipaarniarnermi sulisartut suliffissaaleqilersinnaanerat Inuit Ataqatigiit ernummatigaat.
Sipaarniarnerullu kommunit artorsissinnagai ernumassutigaa.
- Sanaartugassanut sipaarniarneq kommunet aningaasaqarnerannut ikilisaanertut aamma taaneqarsinnaavoq, Aqqaluaq B. Egede oqarpoq.
Aningaasaqarnernermut naalakkersuisoq, Vittus Qujaukitsoq aningaasanut inatsisissatut siunnersuummik saqqummiinermini coronap ukioq manna ajornartoortitsinerani 595 millionit koruunit toqqaannartumik toqqaannanngitsumillu nunatta karsianut aningaasartuutaassasut naatsorsuutigaa.
