Københavnip mittarfissua aasaq manna aatsaat taama ulapaarfiutigisoq

Københavnip mittarfissua aasaq manna aatsaat taama ularpaarfiutigaaq. 

Aasap qaammataasa ingerlanerini ilaasut 9,7 millionit mittarfissuatigoorsimapput, aatsaallu taama amerlatigaat.

Tamanna Københavnip mittarfissuaniit tusagassiuutitigut nalunaarummi allaaserineqarpoq.

Peter Krogsgaard, Københavnip mittarfissuani tuniniaanermi pisortaanerup, inuit angalarusussuseqarnerat upernaamiilli annertusimasoq inuillu angalarusussusaat annertooq aasap ingerlanerani allanngorsimanngitsoq. 

- Danskit svenskillu aallariartortarput, kisianni aamma nunanit allaneersut Danmarkimut sulinngiffeqarnerminni angalanerminni tikerarput, Peter Krogsgaard, Københavnip mittarfissuani tuniniaanermi pisortaaneq oqarpoq. 

Europap kujasinnerusortaata tungaanut

Timmisartunut ilaasut, 2024-mi ukiup taamaalinerani ilaasut amerlassusaannut naleqqiullugit, 7 procentimik aasaq manna amerleriarsimapput.

Københavnip mittarfissuaniit ilaasut affaata missai, ilaatigut Europap kujasinnerusortaata tungaanut seqinersioriarlutik angalasut, danskiusut svenskiusulluunniit, allaaserineqarpoq. 

Ilaasut sinneri nunanit tamalaaneersuupput, pingaartumik nunat EU-meersuniit, USA-miit imaluunniit Tuluit Nunaannersut.

Tamannalu ilutigalugu, ilaasut allat, nunanut allanut angalanissaminnut atatillugu Københavnip mittarfissuanut aqqusaartut, amerliartorput. 

- Mittarfimmiit angalaffissat suli amerleqqinneri iluaqutigisimavarput. Maanngaanniit nunat angalaffissat amerlinikuupput, soorlu Asiamut, kisianni aamma USA-mut Amerika avannarlermullu angalaffissat, Peter Krogsgaard oqarpoq.

Juni, juli aggustimilu Københavnip mittarfissuaniit angalasut 2 millionit pallillugit, angalanerminnut atatillugu aqqusaartuusut, mittarfimmiit paasissutissiissutigineqarpoq. Taakku 2024-mi aasami angalasunut naleqqiullugit 21 procentinik amerlanerupput. 

/ritzau/