Inatsisartunut siunnersuut: Aallaasit imassallu immikkoortillugit angerlarsimaffinni paarineqartassapput
Sakkut pillugit inatsisip sukaternissaanik siunnersuut saqqummiunneqarpoq pisut alianartut aallaasinik aallartoornermi, toqutseriarnerni imminullu toquttoqarnerani nalaanneqartarmata. Naalakkersuisut aalajangiiffigisassatut siunnersuutip saqqummiunnerani allapput.
Sakkut pillugit inatsisip sukaternissaani pingaarnerit tassaapput sakkunik atuisinnaasut pigisaqarsinnaasullu ukiuisa allanngortinnissaat kiisalu aallaasit imassallu inissittarnerannut malittarisassat sukaternissaat.
Naalakkersuisut siunnersuutigaat aallaasinik pigisaqarlunilu atuisinnaanermut ukiunut killigitinneqartoq ullumikkut aqqaneq marlunnik ukiulinnut killilik 15-nik ukiulinnut qaffanneqassasoq.
Taamaattoq meeqqat 15-it ataallugit ukiullit aallaasinik atuisinnaanermut mattunneqavinngillat – tamanna ingiallorteqarnikkut pisinnaappat.
- Meeqqat 12-15-it akornanni ukiullit piniakkanut killilersukkanut piniarsinnaatitaapput, matumani pineqartoq inummik nammineersinnaassusilimmik ingiallorteqarpat, piniarnermut aalisarnermullu Naalakkersuisoq Peter Borg siunnersuutip saqqummiunnissaani allappoq.
Inissiisarneq
Sukateriffigineqartussaq alla tassaavoq aallaasit imassallu inissinneqartarnerat.
- Siunnersuutikkut sakkut tassungalu attuumassutillit imassallu isumannaatsumik allanut susassaqanngitsunit tikinneqarsinnaajunnaarlugit inissinneqartarnissaannik piumasaqaammik atuutsitsisoqalissaaq. Tamatuma kinguneraa sakkut piginnittut akuersisinnagit imaaliallaannaq tiguneqarsinnaajunnaartillugillu atorneqarsinnaajunnaarnissaat. Siunnersuutip aamma malitsigissavaa aallaasit suulluunnit, taassumalu ilaa imassaannit avissaarsimatinnissaat, assersuutigalugu imassat amusarissamiitillugit imaluunniit parnaartartumiitillugit aallaammit immikkoortillugit, Peter Borg allappoq.
Siunnersuutip saqqummiunnissaanut atatillugu oqaatigineqarpoq sakkut pillugit Nunatsinni inatsisip 1992-mi atulernerata kingorna una allannguutit annertunersarigaat.
Arsaarinnittarneq
Siunnersuullu piffissami sivisuumi piareersarneqarpoq.
Naalakkersuisut aamma inatsisinik atuutsitsinermut ministeriaqarfik 2018-mi ataatsimeeqatigiikkamik isumaqatigiissutigaat sakkut pillugit Nunatsinni inatsisitip pissutsinut naleqqussarnissaanut piffissanngortoq ajutoornerit pinerlunniarnerillu pitsaaliorniarlugit.
Aalisarnermut piniarnermullu naalakkersuisoqarfik siunnersuummik suliaqartussanngortinneqarpoq.
Siunnersuutip suliarnerata nalaani aalisarnermut piniarnermullu inatsit nutarterneqarpoq meeqqat aqqaneq marlunnik ukioqalereersimasut sunngiffimmi aallaaniarsinnaanermut akuersissummik pissarsisinnaalersillugit aammalu inuussutissarsiutigalugu aallaaniarsinnaanermut akuersissummik pissarsisinnaasut 15-lereersimasunut killilerneqarmata.
Taamaattumik sakkut pillugit inatsisip allannguutissaatut siunnersuut aatsaat maanna saqqummiunneqartoq Naalakkersuisut ilisimatitsipput.
Sakkut pillugit inatsisip unioqqutinneqarnerani arsaarinnittoqarsinnaasoq siunnersuummi allassimavoq. Siunnersuut siullermeerlugu oktoberip aallaqqaataani suliarineqassaaq inaarlugulu suliarinera novemberip sisamaani pissasoq ilimagineqarluni.
