Peqqinnissaqarfimmi sulisunut isumaqatigiissutissaq nutaaq pillugu taasineq naligiiffiusoq

Peqqinnissaqarfimmi sulisunut isumaqatigiissutissap nutaap ippassaq taasissutigineqarnera naligiiffiuvoq.

48,55 procentit akuersillutik taasipput - amerlaqateqqissaavilu akuersinatik taasillutik.

Taamaattumik taasinerup inernera decimalinit marlunniit aalajangerneqarpoq.

PPK-mi, Kalaallit Nunaanni Peqqinnissaq pillugu Kattuffiit siulittaasuata, Ken Jensenip, taasinerup inernera asseqannginnerarpaa:

- Inernera asseqanngilaq, tamannalu siulersuisuniit isummerfigisariaqarparput. Taasititsinermi atugassarititaasut tassa taamaapput. Inernera naligiiffiusinnaavoq, taamaattoqarporlu. Taamaattumik malittarisassagut naapertorlugit susoqassanersoq, eqqartuussuserisorput isumasioqatigalugu misissuleruttorparput.

Isumaqatigiissutissamut isumaqatiginninniarnerit sivisuumik naammassiniarneqarput. Pisussallu tulliuttut suussanersut paasineqartinnagu, illuatungeriit utaqqilaaqqittariaqarput.

Peqqissaasoq Navarana Helena Johansenip taasinerup inernerata, ilaasortat isumaqatigiinnginnerannik ersersitsisoq isumaqarpoq. 

- Taasinerup inernerata naligiiffiunerata, peqqissaasut avissaaqqanerannik uannut takutitsivoq. Isumaqatigiissutip aqutsisunut pitsaannginnerata peqqissaasunullu aqutsisuunngitsunut pitsaasuunerata, peqqissaasunut avissaaqqatitsivoq.

Taasisullu procentinngorlugit appasinnera aamma tikkuarpaa. 

- Assut ajuusaarnarpoq. Taasinissap ingerlanerani arlallit linkimik taasiffissaminnik tigusaqarsimannginnertik naammagittaalliuutigaat tamannalu taasisinnaasut pingajorarterutaat taaseqataasimannginnerannut peqqutaaqataasinnaanera aarlerisinnaavara, Navarana Helena Johansen oqarpoq.

Taaseqataasinnaasuni 63,14 procent taaseqataapput, 84-it akuersillutik, 84-it akuersinatik. Taaseqataasunit tallimat taasiffissaq immersorsimanngilaat.

Taasinerullu inernera naligiiffiugallartillugu, isumaqatigiissutip qanoq innissaa - siunissarlu - suli nalunarallarpoq. Suliugallaq.