Kalaallit Nunaanni politiit takkutilerput: Siammasinnerusumik sulisussarsiorusuppugut

Sisimiuni, Ilulissani, Aasiaanni, Nuummi, Tasiilami Qaqortumilu innuttaasut politiit suliassai, ilinniartunngornissamut aqqutit atorfeqarnermilu periarfissat pillugit politiinik oqaloqateqarlutik paasisaqarnerunissartik periarfissarilerpaat.  Suliniummi nuna tamakkerlugu ingerlanneqartumi, siammasinnerusumik sulisussarsiornissaq sumiiffinnilu najuunnerunissaq siunertarineqarpoq.

Danmarkimi inatsisinik atuutsitsinermut ministereqarfik Kalaallit Nunaannilu politiit suliniummi suliaqartuupput.

- Innuttaasut qanimut naapikkusupagut politiillu suliffeqarfittut qanoq innera paasitikkusullugit. Politiit tassaapput suliamut inuttullu ullut tamaasa allannguisinnaasut. Toqqissisimaneq, isumannaatsuuneq politiillu najuuttarnissaat pineqarput, Kalaallit Nunaata politiivini sulisoqarnermut pisortaq, Martin Bernhard oqarpoq. 

Suliniut nutaaq pissutigalugu, politiinngorniartunut qinnuteqarfissaq qaammammik ataatsimik sivitsorneqarpoq — oktobarip 15-iannut.

Politiit naapertorlugit, illoqarfinni arfinilinni tamani paasisitsiniaanerit ingerlanneqarnissaat qulakkeeqqaarumallugu, qinnuteqarnissamut piffissaliussaq sivitsorneqarpoq.

Politiit sulisoqarnermilu immikkoortortami sulisut paasisitsiniaanerni naapitassaajumaarput.

Poliitiit qassit massakkorpiaq sulisorineqarnersut suliffissallu qassit inuttaligassaanersut, politiiniit oqaatigineqarumanngilaq, politiilli suliffissarsiorfianut innersussipput.

Paasisitsiniaanissamut pilersaarut:

Sisimiut – 4. september nal. 18.00, politeeqarfimmi

Ilulissat – 9. september nal. 18.00, politeeqarfimmi

Aasiaat – 10. september nal. 18.00, politeeqarfimmi

Nuuk – 17. september nal. 18.00, politeeqarfimmi

Tasiilaq – 24. september nal. 18.00, Majoriami

Qaqortoq – 9. oktober nal. 18.00, Campus Kujallermi