Aki-Matilda Høegh-Dam Folketingimiit sulinngiffeqaqqikkumasoq

Altinget naapertorlugu, kalaallit folketingimut ilaasortaatitaata Inatsisartut ukiaanerani ataatsimiinnissaat ukkatarerusuppaa.

Allattoq Ritzau

septembarip 04-at 2025 06:22

Nutserisoq Medea Olsen, Tabetha Kreutzmann

Naleqqap Folketingimut ilaasortaatitaat, Aki-Matilda Høegh-Dam, Folketingimiit maanna sulinngiffeqarumalluni qinnuteqartoq, Altinget allappoq.

- Inatsisartut ataatsimiilerput, ataatsimiinnissamullu nukissaqarluarusuppunga, Aki-Matilda Høegh-Dam Altinget-imut oqarpoq.

Sulinngiffeqarneq Altinget naapertorlugu Inatsisartut ukiaanerani ataatsimiilerneranni septembarip 19-ianni aallartissaaq, ataatsimiinnerlu novembarip 14-ata tungaanut ingerlanneqassalluni.

Taamaattumik Folketingi oktoberip aallartinnerani ammaanersiorpat peqataanavianngilaq.

Folketingi marlunngorneq oktobarip arfineq-aappaani ammaanersiussaaq, ullullu marluk qaangiuppata oqallinneq ammassalluni.

Aki-Matilda Høegh-Dam 2023-mi, Siumut sinnerlugu ilaasortaagallarami, Folketingip ammaanersiorneranut aamma peqataanngilaq. Tamanna USA-mi pikkorissariarneranik peqquteqarpoq.

Ikaarsaarneq arriitsoq

Aki-Matilda Høegh-Dam namminiilivinnissamik suliniuteqartumut Naleqqami ilaasortanngoqqammerluni marsimi Inatsisartunut qinigaavoq.

Taamanimiilli Inatsisartuni Folketingimilu ilaasortaavoq – marloqiusamillu inissisimaffeqarnera isornartorsiorneqarsimavoq. Ilaatigut ilaasortaaffigisamini marlunni akissarsiaqarnini pissutigalugu.

Nunatsinni marsimi qinersisoqareermat Aki-Matilda Høegh-Dam „ukiup ingerlanerani“ Folketingimi ilaasortaajunnaarniarluni oqarpoq.

- Inatsisit suliarisimasama ilaasa naammassineqarnissaat qulakkeerniarpara, taamaanngippat ikaarsaarneq arriitsumik ingerlatissavarput, taamanikkut DR-imut oqarpoq.

Taamaakkaluartoq Folketingimi 2019-imi qinigaaffimmini ilaasortaaginnarpoq.

/ritzau/

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.