Politiit ullormut nalunaarutaat: Nuummi umiatsiami ikuallangaatsiartoqartoq

Nuummi ikiuallattoqarnerani ajoqusertoqanngilaq. Kisianni putsumik najuussuisimanermi inuummarluutigilikkamik, ikiortissarsiornissaq pingaaruteqarpoq, taamak politiit oqarput.

Nuummi umiatsiamik ikuallattoqalerneranik Politiit ullaaq ulappupput. Assi © : KNR/Aviâja Kilime

Allattoq Ann-Sophie Greve Møller

septembarip 04-at 2025 11:45

Nutserisoq Karla Heilmann

Nuummi ullaaq pisoqalaavissimaqaaq. Nuummi umiarsualivimmi umiatsiap ikuallalersimanera pillugu sisamanngornermi ullaakkut nalunaaqutaq 07.57 politiit nalunaarfigineqarput.

- Kissarsuut uuliatortoq pissusissamisut atorsinnaanngitsoq ikuallalersimassangatinneqarpoq, taamak Kalaallit Nunaanni Politiit pigaartuisa pisortaat Heini Jacobsen oqarpoq.

Ikuallattoq qaminneqarpoq, inuk ataaseq putsumik najuussuisimannginnissaa qulakkeerniarlugu napparsimmavimmukaanneqarpoq. Pisoqarnerata kingorna inuk taanna ajunngilaq.

Pujoq ulorianartoq pineqarpoq, umiatsiarmi ikuallattoq glasfiberiugami.

- Inuit putsumik najuussuisimanermi inuummarlulissagunik ikiortissarsiussapput, pigaartut pisortaat oqarpoq.

Umiatsiaq pineqartoq aserorpoq, umiatsiarlu sanianiittoq annikitsumik ajoquserpoq.

Politiit misissuipput, kisianni pasinarsinnaasumik pinerlinermilluunniit pisoqarsimanngilaq. Taamaattumik angallat inuanut tunniuteqqinneqarpoq.

Kamarujussuartoq

Nuummi Politiit aserorterisoqangaatsiarsimanera pissutigalugu unnuaq aamma orniguttariaqarsimapput.

- Inuk ataaseq kamarujussuarpoq aserorteringaatsiarlunilu. Nagataani tigusarineqarpoq, aserorterisimasutullu unnerluutigineqassalluni, pigaartut pisortaat paasissutissiivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.