KJ Greenland Ilulissani mittarfimmi illorsuarliortiternissamut isumaqatigiissumut millionilikkaanik nalilimmut ajugaasuupput
Nuummi Ilulissanilu maanna mittarfissualiuleruttorput. Illoqarfinnimi taakkunani marlunni nunamik assaanerit, qaartiterinerit illuliornermilu maskinat nipaat ulluinnarsiutaapput.
Naak miffissiat ilusinikkiartulereeraluartut, illutassaat suli sanaartorneqanngillat.
AAMMA ATUARUK Mittarfiit: 900 millionit koruuninik atorniarusunneq partiinik ernumalersitsisoq
Illutassaalli Ilulissani aasamiit sanaartorneqalissapput, tassami ilulissani sanaartortussat KJ Greenland A/S Kalaallit Airportsimik ullumi atsioqatiginnipput. Kalaallit Airportsimi, Sanaartornermut Pisortaq Aviaaja Karlshøj Knudsen taama oqarpoq.
- Unammisitsinitsinni KJ Greenlandikkut neqoroorummut torrallaanerpaapput. Tassanilu neqoroorutaat assigiinngitsut nalilersornikuuagut. Akiinnaanngitsoq, sulialli qanoq ingerlanneqarnissaa, nunatsinninngaanneersunit sulisoqassanersut assiinngitsullu nalilersornikuuagut. KJ Greenlandikkullu taakkuupput torrallaanerpaasimasut.
Aviaaja Karlshøj Knudsen KNR-imut oqarpoq.
AAMMA ATUARUK KAIR: Piumasaqaatit nutaat 900 millionit koruuninnik immaqa naleqassapput
Sanaartornermulli pisortap sanaartornissamut isumaqatigiissut qanoq aningaasartaqartiginersoq unammilleqatigiinneq peqqutigalugu oqaaseqarfigerusunngilai.
Illuliornissat pingasut 2022-imi
Taamaattorli Kalaallit Airports KJ Greenland A/S-ilu isumaqatigiissutaata aningaasartaat millionilikkaanik pingasunik kisitsisitaqartut isertuunneqanngilaq.
* Nuummi Ilulissanilu mittarfiit 2200 meterinut tallineqassapput, Atlantikoq qulaallugu timmisartuussinermi mittarfittut atorneqarsinnaanngortillugit.
* Qaqortumi nunap immikkoortuani meterinik 1500-nik takissusilimmik mittarfiliortoqassaaq.
* Mittarfissat taakku pingasuusut 3,6 milliardit koruunit missaannik akeqassangatinneqarput.
Ilulissani mittarfiliassaq pingasunik illutaqassaaq. Angalasut isertagassaat, timmisartoqqarfiup atortorissaarutaasa illutassaat kiisalu mittarfissuup napasuliartaa. Taakku 2022-ip aallartinnerani sanaartorneqassapput, mittarfissuullu sinneratut 2024-imi naammassissalluni.
Sanaartorneq 2023-imi naammasisussaagaluartoq, ukiumi ataatsimik kinguaattoorpoq.
Sanaartornissamut neqoroortut KJ Greenland A/S-ip saniatigut pingasuupput, tassa MT Højgaard, Istak aamma Articon.
MT Højgaard Nuummi mittarfiliortuuvoq. Angalasut isertagassaat, timmisartoqqarfiup atortorissaarutaasa illutassaat kiisalu mittarfissuup napasuliartaa sanassavai.
Nuummi mittarfissualiap 2023-imi naammassinissaa Kallaallit Airportsip naatsorsuutigaa.
Nuummi, Ilulissani Qaqortumilu mittarfissualiassat tamarmik katillugit minnerpaamik 3,6 milliardit koruuninik akeqassagatinneqarput.
KJ Greenland 2011-imi pilersinneqarpoq. Sanaartugassanillu angisuunik arlalinnik sanaartugaqarluni, soorlu Ilulissani Icefjordcenterimik Hotel Iliulissallu.
