Mittarfiit: 900 millionit koruuninik atorniarusunneq partiinik ernumalersitsisoq
Aningaasat mittarfissualiornermut atorneqartussat allannguuteqassappata inatsisartut aalajangiiffigisussaagaat, Inuit Ataqatigiit oqarpoq.
- Mittarfiit pillugit massakkut saqqummertut tusagassiorfitsigut ilaatigut aamma sanaartornermi ataatsimiitsitaliaq aqqutigalugu taakkua paasissutissanik tamakkiisumik pisariaqartitsisimalertsinnik tunngavissuusoq Inuit Ataqatigiinninngaanniit isumaqarpugut, Inuit Ataqagiiit siulitaasuat Múte Bourup Egede taama oqarpoq.
Kalaallit Airports International A/S-ip aningaasaqarnera
Nuummi Ilulissanilu mittarfissuassat Namminersorlutik Oqartussanit danskillu naalagaaffianit aningaasanik Nationalbankenimit Nordisk Investerings Bankenimillu atornikkut pigineqarput.
Namminersorlutik Oqartussat: 1,400 mia. kr.
Naalagaaffik: 700 mio. kr.
Nationalbanken (taarsigasseeqqinneq): 450 mio. kr.
Nordisk Investerings Bank (atorneq): 450 mio. kr.
Katillutik: 3 mia. koruunit.
Ingerlatsinermut piumasaqaatit nutaat
Ingerlatseqatigiiffiup 900 million koruunnik taarsigassarsinermigut mittarfimmi ingerlatsinermi piumasaqaatit nutaat naammassinissaat qulakkiissavaa.
Kalaallit Airport Holdingimi pisortaq Jens Lauridsen taama oqarpoq.
AAMMA ATUARUK KAIR: Piumasaqaatit nutaat 900 millionit koruuninnik immaqa naleqassapput
Taamali aningaasanik amerlatigisunik ingerlatseqatigiiffik taarsigassarsisariaqanngilaq. Naleqqameersoq Pele Broberg taaa isumaqarpoq.
- 900 millioninik nassaartussaanngilagut, Kalaallit Airports una suliaat unikaallatseriarlugu nalilersoqqittariaqarparput qanoq ingerlariaqqissanerlugu inuiaqatigiittut, Pele Broberg taama oqarpoq.
Aningasanik taama amerlatigisunik pisariaqartitsilerneq taassuma uggornartutut isigaa.
- Akissaqannginnatta neriorsuutigisatta piviusunngortinnissaanut massakkut tuneqqilaartigut, taanna piviusorsiortutut isiginngilarput ingerlariaqqinneq, taamaammat naamerluinnaq tapersersinnaanngilarput taamatut ingerlatsineq.
Sanaartornermut ataatsimiitsitaliaq isorinnittoq
Kalaallit Airports International A/S-ip Nuummi Ilulissanilu mittarfiliornermut atatillugu 900 milllion kr-nik taarsigassarsinissamik misissuinissaanik Naalakkersuisunit tunuartunit akuerineqarsimasoq qanittukkut saqqummiunneqarpoq.
Mittarfiliornermi aningaasartuutitit amerlisimanerannut atatillugu Naalakkersuisut mittarfiliortiternermik suliaqarnerat, Inatsisartut Sanaartornermut Ataatsimiititaliaata isornartorsiorpaa. Naalakkersuisullu killiffimmik nassuiaanissaat aqtaatsimiititaliap ujartorpaa.
Paasissutissiilluarnissarlu pisariaqartoq, Múte Bourup Egede isumaqarpoq:
- Naalakkersuisut aamma ersarissuliortariaqarput, Inatsisartut sinaakkusiorsimasaat sipporlugu sulinissaq massakkut piviusunngulersimappat, taava piaarnerpaamik Inatsisartut taanna suliassarivaat.
- Mittarfiit pillugit inatsit sanaartornissaat inatsit sinaakkusiinikuuvoq, anigaasaliissutissat qanoq annertutigisut atorneqassanersut. Taannalu nikisinneqassappat inatsisiliorsimasut tassa taakkuupput allanguisussat taakkuuppullu Inatsisartut, Inuit Ataqagiiit siulitaasuat Múte Bourup Egede taama oqarpoq.
Nuummi Ilulissanilu mittarfiliornermi aningaasartuutit amerliartornerannut annilaangassuteqartoqarnerra paasisinnaallugu, ineqarnermut attaveqaqatigiinnermullu naalakkersuisoq, Karl Frederik Danielsen, tusagassiuutinut nalunaaruteqarluni allapoq.
AAMMA ATUARUK Justus Hansen: Mittarfissualiornernut aningaasaqarnermik aallaqqaataaniilli aqutsinerluttoqarpoq
Erseqqissarpaali, Kalaallit Airportsip aningaasanik attartugassarsioniarnissaani suli killiffigineqanngitsoq.
Karl Frederik Danielsen pineqartoq pillugu KNR-imit oqaloqatiginiarlugu saaffineqaraluarpoq akissuteqarsimananili.
