Kim Kielsenip siunnersuutaa partiimut siulittaasussamik Siumut nuna tamakkerlugu novembarip ulluisa 27-annit 29-anut ataatsimeersuarnerani qinersinissamut sapaatip akunnera sioqqullugu saqqummiunneqarpoq.Assi: KNR

Kim Kielsen qineqqusaaruteqartoq: Nunaqarfinni inuusuttut internet atorlugu ilinniassasut

Nunaqarfinni innuttaasut amerlanerusut internet aqqutigalugu ilinniagaqassapput. Siumup siulittaasua, Kim Kielsen taama siunnersuuteqarpoq. Tamanna nunaqarfinnut ineriartortitseqataassaaq.

Nunaqarfiit nunatta nukittoqutigai – nunaqarfinnilu innuttaasut ilinniagaqaleraluarunik suli nukittoqutaanerulersinnaapput.

Siumup siulittaasua, Kim Kielsen nassuiaammi – partiimit nassiunneqartumi nunaqarfinni innuttaasut amerlanerusut internet aqqutigalugu ilinniagaqalernissaannik siunnersuuteqarluni allappoq.

Nunatta ilarujussuani internet ullumikkut ima pitsaatigaaq allaat qarasaasiap saanit ilinniarnertuunngorniarfimmi ilinniarfinnilu ingerlaqqinnerni ilinniartoqarsinnaalluni.

Nunatsinni ilinniarsimasut qaffasissusaat

Nunarput tamakkerlugu ilinniarsimanngitsut ilinniarsimasullu amerlassusaat ukioq 2017/18-imi:

Ilinniagaqanngitsut:
Arnat 52 procentii, angutit 49 procentii.

Sivikitsumik ilinniarfinni ingerlaqqissimasut:
Arnat 29 procentii, angutit 38 procentii.

Ilinniakkat akunnattumik sivisuumillu sivisussuseqartut:
Arnat 19 procentii, angutit 13 procentii.

Nunaqarfinni illoqarfinnilu ilinniarsimanngitsut ilinniarsimasullu amerlassusaat

Nunaqarfinni:
79 procentit ilinniarsimanngillat.
17 procentit sivikitsumik ilinniarfimmi ingerlaqqiffiusumi ilinniagaqarput.
3,8 procentit akunnattumik sivisuumilluunniit ilinniagaqarput.

Illoqarfiit (Nuuk minillugu): 

53 procentit ilinniarsimanngillat.
35 procentit sivikitsumik ilinniarfimmi ingerlaqqiffiusumi ilinniagaqarput.
13 procentit akunnattumik sivisuumilluunniit ilinniarfimmi ilinniagaqarput.

Nuuk: 
32 procentit ilinniarsimanngillat.
37 procentit sivikitsumik ilinniarfimmi ingerlaqqiffiusumi ilinniagaqarput.
32 procentit akunnattumik sivisuumilluunniit ilinniarfimmi ilinniagaqarput.

Paasissutissarsiffik: Nunatsinni innuttaasunik misissuineq 2018, SDU 

- eGUX-ip ukiunik marlunnik ilinniarfiusup nunagisamit ingerlanneqarsinnaalernissaa siorna periarfissanngortipparput. Ilinniarfiit amerlanerusut internetti atorlugu ilinniagaasinnaalernissaat takorloorneqarpoq, Kim Kielsen allappoq.

Tamanna nunaqarfinnit ilinniariartorlutik suliartorlutilluunniit aallartartunut ikinnerulersitsinissamik qulakkeerutaassaaq.

- Nunaqarfinni ilaqutariinnguit pileraangata naliginnaasuusarpoq uiusoq aalisartuunngikkuni piniartuusartoq, nuliaasorlu angerlarsimaannartarluni. Takorlooruk arnaq internet atorlugu ilinniarnertuunngorsimaguni kingornalu ilinniartitsisutut, peqqissaasutut, perorsaasutut imaluunniit isumaginninnermik siunnersortitut piffissami sivikitsukkaami ilinniariartortarsinnaaguni.

Kielsen: Aningaasaqarnermut iluaqutaassaaq

Kim Kielsenip siunnersuutaa partiimut siulittaasussamik Siumut nuna tamakkerlugu novembarip ulluisa 27-annit 29-anut ataatsimeersuarnerani qinersinissamut sapaatip akunnera sioqqullugu saqqummiunneqarpoq.

Maanna siulittaasuusup siunnersuutini aningaasaqarnermik tunngavilersorpaa.

AAMMA ATUARUK Aaja Chemnitz Larsen: Inoqarfiit siunissaat oqallisigisariaqarpavut

- Tamatigut nunaqarfimmi najugalik ass. peqqissaasutut ilinniagaqareeraangat nunattalu avataaniit ilinniarsimasunik taarsiilluni, ilinniarsimasunik amigaateqarnerput ikiliallattarpoq, inuiaqatigiinnullu aningaasaqarnikkut iluaqutaalersarluni, Kim Kielsen allappoq, nangillunilu:

- Aningaasartuutit nunatsinni innuttaasunut atorusunneruakka, inuuniarnitsinnullu pitsanngorsaataatillugit.

Folketingimut ilaasortap, Aaja Chemnitz Larsenip (IA) nunaqarfiit siunissaasa oqallisigineqarnerat oktobarimi allartippaa, taanna ilaatigut ima oqarpoq: ”nunaqarfiit ingerlalluartut nukittorsarneqassapput, nunaqarfiillu inuerukkiartortut ataannarnissamullu tunngavissakitsut ukkatarineqarnerusariaqarput”.

Inuit Ataqatigiit nunaqarfiit siunissaannut atatillugu siunnersuuteqarniarlutik aamma nalunaarutiginikuuaat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat