Aaja Chemnitz Larsen: Inoqarfiit siunissaat oqallisigisariaqarpavut
Nunaqarfiit ingerlalluanngitsut matujartuaarneqassasut Folketingip ammaanersiornerani Inuit Ataqatigiit sinnerlugit ilaasortap Aaja Chemnitz Larsenip oqaatigigaluarpaa.
Taassumali siulittaasuata Múte B. Egedep ulloq ataasiunngitsoq qaangiuttoq taama oqariartuuteqarneq akerlilerpaa:
AAMMA ATUARUK Aaja Chemnitz Larsenip nunaqarfiit matorusukkai
- Manna aqqutigalugu naqissusissavara Inuit Ataqatigiit partiitut siunertarinngisaannarmagu siunertarinngisaannassallugulu inoqarfinnik matooraanissaq.
Taamaakkaluartoq Aaja Chemnitz Larsenip Folketingimi oqariartuutini pingasunngormat uteqqippaa - allatulli oqaasertalerlugu.
- Ullumi Oqaasissara ammaanersiornermi oqaatigisattulli ippoq: Nunaqarfiit ingerlalluartut nukittorsarneqassapput, nunaqarfiillu inuerukkiartortut ataannarnissamullu tunngavissakitsut ukkatarineqarnerusariaqarput.
IA: Inoqarfiit oqallisigineqartariaqartut
Nunaqarfinnulliuna "ukkatarinninnerusariaqarneq" pillugu Aaja Chemnitz Larsenip qanorpiaq isumaqartoq? Partiiniuna isumaqatiginngikkaa?
Apeqqutinut taakkununnga ima akivoq:
- Naamik taamaattoqanngilaq. Piviusoruna oqaluuserigiga. Inuit nunaqarfinniit noorarput. Nunaqarfiit pinngitsaalisamik matuneqarnissaat inuilluunniit pinngitsaalinissaannik oqaatigikuunngisaannarpara.
Aaja Chemnitz Larsen "nunaqarfiit ukkatarinerunissaannik" oqarami inoqarfiit ineriartornerat politikikkut eqqumaffigineqarnerusariaqarnerat pivaa.
AAMMA ATUARUK IA-p Aaja Chemnitz Larsen akerlilerpaa: Soorunami nunaqarfinnik matoorisoqassanngilaq
Taamaammat nunatsinni nuttarneq pillugu Inuit Ataqatigiit siulersuisuuneri kommunimut aappaagu apriilimi qinersinnginnitsinni politikiliorpoq. Múte B. Egedep taamaaliorniarneq uppernarsarpaa. Tamanna Aaja Chemnitz Larsenip Folketingip ammaanersiornerani oqariartuuteqareernerata kingorna pivoq.
Politikiliorneq partiimi oqallinnermik nunaqarfiillu pillugit ilisimasanik katersuinermik tunngaveqassasoq, Aaja Chemnitz Larsen oqarpoq.
- Inuiaqatigiit tusarnaarnissaat, misissuinissaq nunaqarfiillu qimagarneqartut ukkatarinissaat pissusissamisoorpoq. Taakkunanimi najugaqartut ikiorneqarnissamut qulakkeerunneqannginnerpaapput.
Oqallisigisassaq sapernartoq pisariaqarpoq
Naalakkersuisut Kim Kielsen siuttoralugu Nuna tamakkerlugu pilersaarummut nassuiaat "Tulleriaarineq pisariaqarpoq" 2016-imi saqqummiuppaat.
Kommunalbestyrelsit, Naalakkersuisut Inatsisartullu "najugaqarfiit annertuumik ingerlatsivissatut, ataatsimoorussaqarfiusussatullu" pingaarnersiussagaat tassani allassimavoq. Najugaqarfiit allat "ukiuni aggersuni allatut ineriartortitaanissaat oqaatigineqassaaq" allassimavoq.
Nalunaarusiarli saqqummiunneqarmat Kim Kielsenimit ingerlaannaq tunuartinneqarpoq. Taamaaliorneq nunaqarfinni isumaginninnermut, peqqinnissaqarfinnut, politeeqarnermut kommunefogedeqarnermullu periarfissakinnerunermut "isiginngitsuusaarnerusoq" Aaja Chemnitz Larsen isumaqarpoq,
Inuiaqatigiit atugarissaarnissaannut naligiimmik periarfissaqartitsinissamut kommunit Namminersorlutillu Oqartussat pisussaaffimminnit qimarratiginnittut, taanna oqarpoq.
- Nunatsinni najugaqartut tamarmik, illoqarfimmiuugunik nunaqarfimmiuugunilluunniit, ikiorneqarnissamut pisariaqartitsigunik saaffissaqarlutik ilisimassavaat. Assersuutigalugu meeraq atornerlugaasimasoq - aamma nunaqarfimmiuugaluaruniluunniit.00:04:39
IA-p nuttarnermut politikia nunaqarfinnik matooraanissamut innersuussutaassanngitsoq siulittaasoq Múte B. Egede oqarpoq. Nuttarnerli pillugu misissuinissaq pisariaqarnerarlugu.
