Ilulissani takornariaqarnerup iluani aaqqiagiinnginneq annertusiartorpoq – inuussutissarsiornermut naalakkersuisoq Naaja H. Nathanielsen (IA) maanna takornariaqarnermik suliaqartut ilaannit ammasumik isornartorsiorneqarpoq.

Takornariat takornarialerisullu suliffeqarfiutaat Ilulissani akerliussutsimik takutitsisoqarnerani pissusiluttoqarsimanera ersigilersitsisoqarsimasorlu "akuerineqarsinnaanngitsoq", sapaatip-akunnerata aallartinnerani tusagassiorfinnut nalunaaruteqarnermini oqaatigaa. Tassunga atatillugu Avannaata Kommuniani borgmesteri Lars Erik Gabrielsen (S) isornartorsiorpaa nammineq akerliussutsimik takutitsinermi peqataasimammat.

Ilulissat Excursionsimi pisortaq Jan Cortsen naapertorlugu isornartorsiuineq pineqartoq, ajoqusiisinnaallunilu eqqunngitsumik isumaqarpoq.

– Avataaniit suliffissat illersorniarlugit Ilulissani innuttaasut aammalu inuiaqatigiinni ilaasortat eqqugaasillugit eqqarsarneq kingunerlussinnaavoq. Inuit ataasiakkaarlugit taamatut pineqarnissaat akuerineqarsinnaanngilaq, taanna oqarpoq, erseqqissumillu piumasaqarpoq:

– Naaja H. Nathanielsenip naalakkersuisutut tunuarnissaa kissaatigaara.

Innuttaasut tusaaneqanngitsutut misigisimapput

Ilulissani takornariaqarnermik suliaqartut nunanit allaneersut, takornariaqarnermik isertitaqarnerpaajusarmata naammagisimaarinninngillat. 

Taamaattumik sapaatit akunnerini kingullerni umiarsualiviup eqqaani akerliussutsimik takutitsisoqarpoq.

- Siorasaarinerunngilaq uagut una illoqarfitsinni atorneqannginnatta takornarialerinerup iluani iluamik allannguerusulluta ilungersortugut, JanCortsen oqarpoq.

Ilulissani pisut Visit Greenlandimit kiisalu Sulisitsisunit ernumanartutut isigineqarput, tamanna inuussutissarsiornermut Kalaallit Nunaatalu takornariarfissatut tusaamaneqarneranut ajoqusiisinnaammat.

Taamaattorli Jan Cortsenip taamak iliornermik pingaaruteqartunik tunngaveqartutut isigaa.

– Inuiaqatigiit tamarmik naligiissitaasariaqarput, taamaattumik avissaartuuttitsiniarluni taamatut iliorneq kusanaappoq. Inuiaqatigiinnilu ataatsimoorluta ineriartortitsineq anguniarlugu suleqatigiilluta, illoqarfitsinni nammineq akisussaaffimmik tiguserusuppugut, taanna oqarpoq.

Umiatsiat umiarsualivimmiiginnarput

Naak maanna takornariaqarnerpaaffiup naligigaluaraa takornarialerisut ilaata, Laila Sandgreenip talittarfimmi angallataatitik pingasut uninngaannartut uppernarsarlugit takutippai.

- Pissutsit takutiinnarpaat takornarialerinerup silarsuaani nunaqavissut ingerlatsinnginnerat, taanna oqarpoq.

Takornariaqarnermut inatsit nutaaq ukioq aallartimmat atuutilersinneqartoq naapertorlugu takornariaqarnerup nunaqavissunik tunuliaqutaqarnerulernissaa qulakkeerneqassaaq. Ilulissani innuttaasut takornariaqarnermik suliaqartut naapertorlugit inatsit malunniuteqanngilaq – tamannalu akerliussutsimik takutitsinernik nassataqarpoq.

-Akerliussutsimik takutitsinngikkallaratta qasseriaq ataatsimeeqatiginikuuagut, sorpassuit angunikuuagut kisianni kinguneqanngisaannarpoq kalaaleq nunamini tatigineqannginnami. Illoqarfitsinni uagut akisussaaffik tigorusupparput nunaqqativulllu ineriartoqatigalugit, Laila Sandgreen oqarpoq.