Qitiusumik aqutsinermi allannguineq – Peqqissutsimut immikkoortortaqarfimmi pisortaq soraarpoq
Nike Berthelsenip ukiut pingasut affarlu atorfeqareernerata kingorna sulisutigut allanngortoqarpoq.
Maanna Martin Pedersen peqqissutsimut naalakkersuisoqarfimmi pisortaanerugallartutut atorfinitsinneqarpoq, tamanna pisortat nittartagaanni paasissutissiissutigineqarpoq.
Pisortaanerup allanngorneranut pissutaasimasut pillugit pisortatigoortumik peqqissutsimut immikkoortortaqarfimmit nalunaaruteqartoqanngilaq.
Nike Berthelsen februaarip aallaqqaataani 2022-mi pisortatigoortumik atorfinippoq. Peqqissutsimut immikkoortortaqarfiup ineriartortinneqarnissaa qilanaaralugu, taamani tusagassiuutinut nalunaarummi oqaatigaa.
- Suliassakka aallartillugit sulilernissara qilanaarisorujussuuara. Kalaallit Nunaat peqqissutsimut tunngatillugu annertoorujussuarnik unammilligassaqarpoq. Peqqissutsimut Naalakkersuisumik Naalakkersuisoqarfimmilu sulisunik pisortanillu pikkorilluinnartunik suleqateqarnissara qilanaarisorujussuuara, tassani sulisooreersut peqatigalugit peqqissutsimut tunngatillugu Naalakkersuisut suliakkiissutaat ineriartortillugillu naammassisassavagut, taamani oqarpoq.
Kiinnat nutaat
Isumaginninnermut, Suliffeqarnermut Nunamullu Namminermut Naalakkersuisoqarfimmi pisortatut soraartoq, KNR-ip ullut arfineq-pingasut siornatigut allaaseraa.
Martha Abelsen, ukiup aallartinnerani Siumumit Kommuneqarfik Sermersuumi borgmesterimut qinigassanngortittoq, atorfimminit tunuarpoq.
Allanngortoqarnerata pissutaa pillugu pisortatigoortumik nalunaaruteqartoqanngilaq.
Tamannalu Naalakkersuisut Siulittaasuata Naalakkersuisoqarfiani pisortap, Hans-Peder Barlach Christensenip uppernarsarpaa:
- Martha Abelsen atorfimmit pisortatigoortumik maajip 31-ani soraarpoq. Sulinermi isumaqatigiissut naapertorlugu soraarnissaa immikkut aningaasatigut atugassaqartitsiviunngitsumik isumaqatigiissuteqarfiusumillu isumaqatigiissutigineqarpoq.
