Aka Olesen naalakkersuisoqarfimmi pisortanngortoq

Aka Olesen Peqqissutsimut inunnullu Innarluutilinnut Naalakkersuisoqarfimmi decembarip aallaqqaataani pisortanngussaaq. 

Naalakkersuisut nittartakkamini tamanna nalunaarutigaat.

Taamaalilluni naalakkersuisoqarfik, Nike Berthelsen naalakkersuisoqarfimmi ukiut sisamaat avillugu  pisortaareerluni juulimi soraarmalli, pisortartaarpoq. Taanna soraarmalli Martin Pedersen naalakkersuisoqarfimmi pisortaagallarpoq. 

Aka Olesen Nunatta Peqqinnissaqarfiani Dronning Ingridip Napparsimavissuani pisortap tulliatut atorfimminiit sulilissaaq.

Taanna peqqissaasutut ilinniarsimasuuvoq aamma innuttaasut peqqissusaat pillugit Aalborg Universitetianit kandidatitut ilinniarsimasuulluni. Paamiut napparsimavianni immikkoortortaqarfimmi peqqissaasutut ilaatigut sulivoq. Tamatuma saniatigut politikkip tungaatigut misilittagaqarluni.  Aamma Peqqissutsimut Naalakkersuisoqarfimmi immikkoortortaqarfimmi ilaatigut pisortaasarluni.

Aka Olesenip atorfinitsinneqarnera pillugu naalakkersuisoqarfik ilaatigut ima allappoq:

- Akisussaaffeqarfimmi imaanngitsunik suliaqarfiusartumi sulinermik misilittagaqarluarlunilu paasisimasaqarluartuunermigut naalakkersuisoqarfimmi ingerlatsinikkut pilersaarusiukkamik pitsaasumillu aqutsinissaa qularinngilarput.

Aka Olesen atorfittaamini sulilerpat, naalakkersuisuni pisortassaq nutaaq alla ulloq taanna sulilissaaq. Isumaginninnermut, Mikael Mansi Rasmussen Suliffeqarnermut Nunamullu Namminermut Naalakkersuisoqarfimmi atorfinippoq, tamannalu oktobarip 29-anni avammut saqqummiunneqarpoq.