Medie: Tusagassiuutit: Aallartitap pissaanermik atuisinnaaneq akerlilinngikkaa – namminerli aalajangiisinnaaneq pingaartikkaa

Ken Howeryp USA-p pissaanermik atuisinnaanera akerlilinngilaa, Donald Trumpillu siusinnerusukkut oqaaseqarnera innersuussutigalugu.

Allattoq Markus Valentin

novembarip 06-at 2025 13:46

Amerikamiut aallartitaat, Ken Howery kunngimut Frederimmut ilisaritinneqanngitsiarnermini Danmarks Radiomit sivikitsumik apersorneqarpoq.

USA Kalaallit Nunaannik aqutsilerniarsinnaanera aallartitap akerlilersinnaaneraa tusagassiortut sisamariarlutik apeqqutigaat.

Apeqqutini pingasuni USA Kalaallit Nunaannik aqutsilernissamut pissaanermik atuiniarnersoq apeqqutigineqarpoq.

Aamma atuarukTrumpip Kalaallit Nunaannut pilersaarutaanik isertukkanik allagaatit isertuussat qulaajaapput

Taassumali apeqqutini tamani taama pisoqarsinnaanera akerlilinngilaa.

Kalaallit innuttaasut sinnerlugit maanna apereqqissaanga: USA-p Kalaallit Nunaannik tiguaanissamut pissaaneq atornianngikkaa eqqortuua?

- Præsidentip siusinnerusukkut oqaatigisaanut innersuussuteqaqqissaanga tamannalu taakkununnga eqqissisaataasinnaavoq, Ken Howery Danmarks Radiomut oqarpoq.

USA-p nunatsinnik aqutsilernissamik kissaataa

USA-p Kalaallit Nunaat pigissagaa isumaqarluni, Donald Trump 2024-mi decembarip 23-ani oqaaseqarpoq. Oqariartuut tamanna taassuminnga sulisuiniillu arlalerialugu uterneqarpoq.

Donald Trumpip ernera angajulleq, Donald Trump Jr. Nuummut januaarup arfineq-aappaani tikippoq, tamannalu nunarsuarmit nunarput ukkatarineqalerneranik kinguneqarpoq.

Præsidentinngortussap aningaasaqarneq sakkutuulersornerlu atorlugit Kalaallit Nunaat aqunniassanerlugu mattunnagu ulloq taanna oqaatigaa, aamma naak USA Danmarkilu tamarmik Natomi ilaasortaagaluartut USA-lu nunatsinni Sorsunnersuup Aappaanili sakkutooqarfeqaraluartoq.

Præsident Trumpip Kalaallit Nunaat tiguarniarneraa marsip 13-ianni aperineqarpoq. Taassumalu: - Taamaattoqarnissaa ilimagaara, akissutigaa.

Nuummiut USA-p nunatsinnik tiguserusunneranut akerliullutik marsip 15-ianni akerliussutsiminnik takutitsipput. Nunatta oqaluttuarisaanerani akerliussutsimik takutitsinerit annerpaartarigunarpaat.

Oqallittoqangaatsiarnerata aamma akerliussutsimik takutitsiniartoqarnerata kingunerisaanik amerikamiut præsidentiata tullersortaata, J.D. Vancep nuliata Sisimiunut tikeraarnissamik pilersaarutini taamaatippai. Taarsiulluguli aappartiit marsip 28-anni Pituffik Space Basemukarput, tassanilu tusagassiortunik katersortitsisoqarpoq.

The New York Timerip amerikamiut kalaallinut USA-mut ilanngutitsiniarnissamut - matumani pissaanermik sakkukitsumik aamma namminersortunut aningaasaliissuteqarnikkut soqutiginnitsitsiniarnissamut periusissiaat aprilip qulingani saqqummiuppaa.

Amerikamiut præsidentiata isertortumik paasiniaasartut soorlu CIA-mi NSA-mi DIA-milu pisortat Kalaallit Nunaannut tunngatillugu paasissutissanik katersinerannik annertuseeqqusimgai Wall Street Journalip maajip arfernani saqqummiuppaa. Tassani kalaallit USA-p anguniagaanut iluaqutaasinnaasut ataatsimut isigineqarsinnaalersinneqassasut ilaatigut peqqussutigineqarpoq. Tamanna pissutigalugu amerikamiut Kalaallit Nunaannut kilitsissiatut suliaqarsinnaanera immikkut ilisimasallit nunallu arlallit pasivaat.

Allisiguk

Siusinnerusukkut oqaatigineqartut

Præsidentip Donald Trumpip Kalaallit Nunaannik tigusiniarluni sakkutooqarnermik atuisinnaaneq mattukkusunnagu kiisalu kalaallit Amerikami Naalagaaffinnut ilaaniarnerlutik namminneq aalajangigassarigaat siusinnerusukkut oqaatigaa.

Præsidentillu USA-p Kalaallit Nunaat: “arlaatigut” iluatsikkumaaraa oqaatiginikuullugu.

Aamma atuarukKNR-imiit apersuineq immikkut ittoq: Trumpip nunatsinnut ikinngutaanera amerikamiut senatoriata neriorsuutigigaa

Donald Trumpip Kalaallit Nunaata tiguarneqarnissaa naatsorsuutigineraa tusagassiortumit inimi ataatsimiittarfimmi, Ovale Værelsemik taaneqartartumi aperineqarami, ima akissuteqarpoq:

- Taama pisoqarnissaa ilimagaara.

Ken Howeyllu tassani nammineq aalajangiisinnaassuseqarnerat kiisalu Kalaallit Nunaanni sakkutooqarnikkut pissutsit pingaarnerutippai.

- Præsidentip oqaaserisimasai uteqqinniarpakka, tassa USA-p kalaallit namminneq siunissaminnik aalajangiisinnaassuseqarnerat ataqqivaa. Taassumalu pingaartumik Ruslandimit Kinamiillu Issittumi sorraanneruleriartuinnarnerat eqqarsaatigalugu USA-p isumannaatsuunissaq suli pingaarnerutikkaa siusinnerusukkut aamma oqaatigaa.

Aallartitap nammineq aalajangiisinnaassuseqarnerup pingaartinnerata saniatigut ammasumik oqaloqatigiinnermi suleqatigiinnissaq qilanaaraa.

Aamma atuarukUSA pillugu isummat nikerartut: Nunarput eqqissisimaqqusivoq – Danmarki mianersoqqusivoq

Naalakkersuisut siulittaasuata, Jens-Frederik Nielsenip (D) ernumanissamut tunngavissaqanngitsoq USA-miillu siooranartoqanngitsoq siusinnerusukkut oqaatigaa.

Danskilli ministeriunerat tamatuma muminganik oqaaseqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.