Kalaallit Nunaanni Politiit Peqatigiiffianni siulittaasoq: “Kisitsisit tupaallaatiginngilakka”
Nunatsinni politiit amerlasuut tarnimikkut kingunipiloqartitsiualersimanerat Kalaallit Nunaanni Politiit Peqatigiiffianni siulittaasumut Bjørn Bjerregaardimut tupaallaataanngilaq.
Nunatsinni politiit 9,5 procentiisa aammalu pinerluttulerinermik isumaginnittoqarfimmi sulisut 24,3 procentiisa sakkortuumik misigisaqareernermit kingunerluummik PTSD-mik naliliiffigineqarsinnaanerinik VIVE-p 2019-imi misissuinerata takutitsinera, taassuma innersuussutigaa.
- Nunatsinni politiitut sulinerup sakkortoorujussuunera 2019-imi VIVE-p nalunaarusiaa ersarissumik takutitsivoq. Nunatsinni 9,5 procentit sakkortuumik misigisaqareernermit kingunerluummik PTSD-mik ersiuteqarput, Danmarkimi 3,7 procentiusut. Nunatsinni politiitut sulinerup artornartuunera tassanili ersarissivoq, taanna oqarpoq.
Sulisussanik amigaateqarneq pissutigalugu politiit suliunnaartartut
Thin Blue Line Danmarkip misissuinerata nutaap tamanna aamma uppernarsarpaa.
Kalaallit qallunaallu politiiusimasut politiiusullu 134-t apersorneqarneranni amerlasuut pisunik artornartunik nalaataqartartut erserpoq, soorlu ajutoornernik, imminut toqunnernik kinguaassiuutitigullu innarliinernik. Amerlasuut kingunerlutsitsinernit suli qaangiisimanngillat, suliffimmi tatineqangaarlutik inuttullu ataatsimuussutsimit avinngarusimasutut misigalutik.
VIVE-mit nalunaarusiaq nutaaq tamanna pillugu qanittukkut saqqummertussaasoq, Bjørn Bjerregaard oqaluttuarpoq.
2019-imisulli ersersitsinissaa ernummatigaa. Sulisut amigaataangaarnerat ajornartorsiutit annersaannut ilaavoq, ajornartorsiullu tamanna pitsanngoriartorsimanngilaq.
- Unammillernarnerpaaq aaqqiissutissarlu pitsaanerpaaq tassaaginnarpoq sulisussat. Allaat Nuummi upalungaarsimasuni sulisussaaleqivugut. Naak ilaat sulinngiffeqaraluarlutik suliartortinneqarajupput. Taamaattumik pisariaqartitatsitut kiffaanngissuseqarneq ajorpugut, Bjørn Bjerregaard oqarpoq.
Illoqarfinni minnerusuni nunaqarfinnilu tamanna aamma atuuppoq.
Politiit marluinnaappata friivinnissaq ajornakusoortarpoq. Nalunngilaammi kisimik aggersarneqarsinnaallutik.
- Soorunami ernumanarpoq. Aammami nalunngilarput suleqateqarluta artornartorsiortunik, immaqa aamma utoqqaanertatsinni. Ukiorpassuarni sulisimasunik immaqalu ullumikkut ikiorsiisoqartarneratut siornatigut ikiorserneqarsimanngitsunik. Nammatarpassuaqarsinnaapput.
Politiit ikioqqunatillu soraartartut
Naak nunatsinni politiit amerlasuut sulinerminnit artukkerneqangaartartut kisitsisit takutikkaluaraat, Kalaallit Nunaanni Politiit Kattuffiat ikioqqusunit saaffigineqartarnerat qaqutigoorpoq. Amerlanerit taamaaliunnginnermini soraartarsimassagunartut, Bjørn Bjerregaard isumaqarpoq.
- Taarseraattuartoqarnera isertugaanngilaq, ajoraluartumillu nunaqavissut amerlasuut soraartarput. Ikioqqullutik saaffiginninnginnerminni ilai soraartarput. Tamannarpiaq pissutigalugu politiit soraartarnersut ernummatigaara – taamaattumillu piffissaatillugu ikiunngitsoortarpavut.
Bjørn Bjerregaardip oqaasii ilumoorunarput, misissuinerummi Thin Blue Line Denmarkimeersup politiit sisamararterutaasa suliaminnit kingunipiloqartitsiualersimanertik pissutigalugu suliffimminnit soraartartut imaluunniit napparsimallutik sulinngiffeqartartut takutimmagu.
Taamaattumik politiit amerlanerulernissaat Bjørn Bjerregaardip neriuutigaa, taamaalillutik ulluinnarni kiffaanngissuseqarnerulerniassammata. Aammattaaq sulisunik attassiinnarnissaq anguniarlugu naapertuilluartumik akissarsiaqartitsinissaq suliffimmilu atugassarititaasut pitsaanerulernissaat anguniagarai.
- Neriuppunga politiinik nunaqavissunik attassiinnarsinnaassasugut. Taakkuami oqaatsitsinnik atuisinnaammata pisariaqartinnerpaavavut. Tamannalu pissutigalugu ilaatigut akissarsiat suliffimmilu atugassarititaasut pillugit suliniuteqartuarpunga.
Qujanartumik suliniuteqarnini angusaqarfigerpasippaa. Ukiummi sisamat utaqqereernerup kingorna isumaqatigiissut nutaaq siorna atsiorneqarpoq, tamatumalu kingunerisaanik kalaallit sulisut 2026-mi apriilimiit Danmarkimi suleqatitik assigalugit akissarsiaqalissapput.
Politiit peqatigiiffiata suliffimmi ajoqusernerit atugarissaarnerlu ukkatarigai
Politiit Peqatigiiffiata sulisunik peqataatitsinikkut ataatsimiititaliamik pilersitsisimanera Bjørn Bjerregaardip aamma oqaatigaa, taannalu inuttut atukkat suliffimmilu ajoqusernerit pillugit suliaqartarpoq.
- Peqatigiiffitsinnit Danmarkimi Politiforbundet suleqatigalugu apeqqutit tamakkua qaqittarpavut. Aamma politikkikkut sulisitsisullu tungaannit maannakkut suliaq ulapputigineqangaarpoq, taanna nassuiaavoq.
Taamaattumik politiit amerliartornissaat aamma politiit kingunipiloqartitsiualersimasut tarnip pissusaanik ilisimasalimmit ikiorneqarlutillu katsorsarneqarsinnaanissaata qulakkeerneqarnissaa neriuutigaa. Immaqalu ullumikkut neqeroorutigineqartunit pitsaanerusumik neqerooruteqartoqarnissaa. Taassuma tungaanut ikiorneqarnissamik pisariaqartitsisoqarpat Kalaallit Nunaanni Politiit Peqatigiiffiannut saaffiginninnissaq nangaassutigineqassanngitsoq, taanna erseqqissaavoq.
- Sulisut ilaasortalluunniit ilaat ikiortariaqalerunik soorunami uagutsinnut saaffiginninnissaat neriuutigaarput – toqqaannartumik imaluunniit aqutsisutik aqqutigalugit. Attavigiuaannarsinnaavaatigut, taamaalilluta tapersersorlugillu ikiorsinnaaniassagatsigit, Bjørn Bjerregaard oqarpoq.
