Greenland Science Week: Ilisimatusarneq nunatsinnut iluaqutaasoq sammineqartoq
Ilisimatusarnermi festivaali, Greenland Science Week aqagu aallartinneqarpat sapaatip akunnera saqqummiinernik, workshoppeqarnernik nalliuttorsiutiginninernillu ilaqassaaq.
Novembarip arfineq-aappaannit 14-iata tungaanut festivaalertitsisoqarnerani ilisimatusarnerup ulluinnarnut qanoq qaninnerulersinneqarsinnaanera qanorlu inuiaqatigiinnut kalaallinut naleqartitsiviusinnaanera nammineqassaaq.
"All Eyes on Greenland"
Festivaalertitsisoqarnerata nalaani Nuummi novembarip aqqaneq-aappaani aqqaneq-pingajuanilu ataatsimeersuartoqassaaq, ukioq mannalu “All Eyes on Greenland” qulequtarineqassalluni.
Ilisimatusartut Issittoq pillugu suliaqarfinni assigiinngitsuni immikkut ilisimasallit ataatsimeerusarnermi ataatsimiissapput. Inuiaqatigiilernermit humanioramiillu pinngortitanerinermut uumassusilerinermullu ilisimatusartusartut nunatta nunarsuarmi sammineqarleriartuinnarnera qanoq iluaqutaasumik sunniuteqartunngortinneqarsinnaanera oqaluuserissavaat.
Nunarsuarmit sammineqarneq nunatsinnit nalaanneqartoq qanoq iliornikkut ilisimatusarnermut kalaallillu inuiaqatigiivinut iluaqutaasunngortinneqarsinnaanera qulakkeerneqassava? Taamaalilluni tamanna Kalaallit Nunaat pillugu kisiat ilisimatusarfiunani kisianni Kalaallit Nunaannut aamma ilisimatusarfiulluni?
Apeqqutit tamakku ataatsimeersuarnermi sammineqassapput, ilaatigullu Kalaallit Nunaata oqaluttuarisaanera siunissaalu, aamma inuit, uumasut uumassusillillu ataqatigiinnerisa allanngoriartornermut qanoq naleqqussarnersut Issittumilu inooriaatsit nutaat aamma sammineqassallutik.
Ilisimatusarnerup inuiaqatigiillu naapinnerat
Nuummi, Ilulissani, Sisimiuni, Kangerlussuarmi Sarfannguanilu sapaatip akunnerata ingerlanerani aamma aaqqissuussisoqartassaaq.
Ilulissani dronit pillugit Workshopeqarnera ilaatigut peqataaffigineqarsinnaavoq, nunarsuarmioqatigiinnut kingornutassanngortitassanngortitamut Sarfannguanukartoqarsinnaavoq imaluunniit Sisimiuni teknologimik ilisimatusarfimmut pulaartoqarsinnaalluni.
Pisussat tamarmik ilisimatusartunit, suliffeqarfinnit najukkanilu suleqatigisanit aaqqissuuneqarput, taakkuli tamarmik ilisimatusarnerup tamanut nuannersuutinneqarnissaa, naleqquttuunissaa tikinneqarsinnaanissaalu ataatsimut anguniagaraat.
Festivaalertoqarnera Nuummi Katuami novembarip 14-ianni tamanut Qaagitsimik taallugu festivalertitsisoqarneranik naggaserneqassaaq.
Uanilu peqataasut tunup sineriaani silasiorfinnit tappiorannartunut aamma nunatsinni puilasunut kissartunut tunngatillugu oqalugiarnerit, workshopertitsinerit ullaamit unnuup tungaanut misigisaqarfigisinnaavaat.
