NUUMMIIT NUUNNEQ Kielsen: Suliassaqarfinnik komuninut nussuinissamut suliaq aallartinneqareerpoq
Namminersorlutik Oqartussat suliassaqarfiisa kommuninut nussorneqarnissaat borgmesterit sisamat piumasaraat.
Kommuninit taama piumasaqartoqarnera pissusissamisuuginnartoq, KANUKOKA-mi pisortaasimasoq isumaqarpoq.
KANUKOKA-llu ullumi pisortaa isumaqarpoq, kommunit aaqqissuunneqarnerannut aaqqissuusseqqinneq unittoorsimasoq.
Aamma atuaruk Asii: Qaa, aallartinniaritsi
Aamma atuaruk KANUKOKA-mi pisortaq: Aaqqissuusseqqinnermi suliaq uninngavoq
Susassaqarfiilli kommuninut tunniunneqarnissaanut ilungersorluni sulisoqartoq, Naalakkersuisut siulittaasuat, Kim Kielsen oqarpoq.
- Suliassat suut kommuninut piaartumik tunniussorneqarsinnaanersut pillugit qulaajagassat qulaajarneqarput. Maani sulisoq ataaseq suliakkerneqareerpoq, qulaajagassanillu qulaajaavoq, Kim Kielsen oqarpoq.
Namminersorlutik Oqartussat suliassaqarfii sorliit nussorneqarsinnaanersut qinigaaffiup naannginnerani paasineqareersimassasoq, Naalakkersuisut siulittaasuata naatsorsuutigaa.
Aamma atuaruk Roger Buch: Sulisut nuuppata kommunimut iluaqutaanerpaassaaq
- Sorliunersut ukiariartornerani paasissallugu naatsorsuutigaarput. Aamma 2017-imi januaarip aallaqqaataani sorliit nuunneqarsinnaanersut paaseriissallugu siunnerfigaarput, Kim Kielsen oqarpoq.
Qaasuitsup Kommuniani, Qeqqata Kommuniani aamma Kommune Kujallermi borgmesterit nalunaarusiaq oqallisaaqisoq "Naligiimmik Siunissaq" ullut qulinngulersut saqqummiummassuk, ilaatigut susassaqarfiit kommuninut nussorneqarnissaat piumasaraat.
Aamma atuaruk Nuutsitsinissamut siunnersuut itigartippaat
Bormesterilli saqqummiinerat suliamut sunniuteqarujussuanngitsoq, Kim Kielsen oqarpoq, borgmesterillu saqqummiussinnginneranni suliaq aallartinneqareersoq nassuiaalluni.
- Uani ukiamili oktobarimi ataatsimiikkatta ersarissumik oqariartuutiginikuuara: suliassat taakkua sorliit kommuninut apuussorneqarsinnaasut piaartumik qulaajarneqassapput, taavalu suliassat taamanili aallartisarlugit pivugut, Naalakkersuisut siulittaasuat Kim Kielsen oqarpoq.