NUUMMIIT NUUNNEQ KANUKOKA-mi pisortaq: Aaqqissuusseqqinnermi suliaq uninngavoq

Kommunit kattussuunneqarnerisa kingorna aaqqissuusseqinnermik sulineq uninngavoq, kommunit ukiut arfineq pingasut matuma siornatigut kattussuunneqarmali ingerlariaqqissimanani. Taama oqarput, siornatigut kommunit kattuffianni KANUKOKA-mi pisortaasimasoq Martha Labansen aamma maannakkut pisortaasoq Hans-Peder Barlach Christensen.
februaarip 22-at 2016 17:49

Qaasuitsup aamma Kujalliup kiisalu Qeqatta Kommuniani borgmesterit nalunaarusiaq naligiimmik siunnissaqarneq tassani suliffiit 600-it Nuummiit sinerissamut nuunneqarnissaanik siunnersuutigineqartoq sapaatip akunnerani kingullermi saqqummiunneqarmat oqallinnermik annertuumik pilersitsivoq.

Nalunaarusiami borgmesterit kaammaatuutigaat kommunit aaqqissuuteqqinneqarnisssaanik suliaq Naalakkersuisut aallartissimasaat aallarteqqinneqartariaqartoq, tassani oqartussaaffiit Namminersorlutik Oqartussani tigummineqartut kommunenut nuunneqarnissaannik imaqarpoq.

Aamma atuaruk Roger Buch: Sulisut nuuppata kommunimut iluaqutaanerpaassaaq

Borgmesterit siunnersutaat  KANUKOKA-p allaffeqarfiani ukiorpassuarni pisortaasimasup Martha Labansenip tapersersorpaa. 

- Taamaattumik tupiginngilara utaqqikatattumik nipeqartumik oqaaseqartoqartarnera, Kommunit kattuffiata KANUKOKA-p allaffqarfiani ukiuni 14-ini pisortaasimasoq Martha Labansen taama oqarpoq. Kommunit kattusuunneqarnissaannut aaqqissuusseqqinnermi isumalioqatigiissitami ilaasortaavoq. 2005-mi isumaliutissiissut kommunit sisamanngornerannik kinguneqarpoq.   

Aamma atuaruk Nuutsitsinissamut siunnersuut itigartippaat

KANUKOKA-mi pisortap aamma aaqqissuusseqqinnermut isumalioqatigiissitami ilaasortaasimasup Hans-Peder Barlach Christensenip Martha Labansen isumaqatigaa, taannami isumaqarpoq kommunit kattussuunneqarnerannik  inatsimmik  allannguinernik  malitseqarsimanngitsoq aaqqissuusseqinnerup siunertaa tassalu allannguinerit piviusunngortitsinerillu pinngitsoorsiimanngimmata.

- Ingattattajaarluni oqassagaanni, ullumikkut kommunit aningisuut killilersorneqarput, assersuutigalugu siornatigut kommunit mikinerpaartaat Ittoqqortoormiit, kommunetut ingerlassinnaasai  pisinnaasaalu aallaaviusarsimapput, taamaattumik torrallaanerusutut ingerlanneqarsinnaagaluit, inatsisit tulluussarneqarneqannginneri pissutaallutik akimmisaartitsingaatisarpoq.

Aamma atuaruk Kattuffiit qularinnittut

Hans-Peder Christensen oqarpoq kommunit kattussuunneqarmatali  innaarluutilinnik sullissineq suliani malunnaatilinni kisimi nuunneqarsimasoq  ullumikkullu pissutsit ima nassuarpai: Kommunit kattunneqarput tassungaarnarlu killippoq, taanna aallarniutaannaanikuuvoq, suliassaqarfiit ikaarsaartinneqarnissaat piareersarneqarnissaallu aallartinneqarnikuunngillat,  taamaattumik pisortat suliassaqarfiisa aaqqissuuteqqinneqarnerat ingerlariaqqinnikuunngilaq, KANUKOKA-p allafeqarfiani pisortaq Hans-Peder Barlach Christensen taama oqarpoq.

Naalakkersuisut tusagassiuutinut ullumi nalunaaruteqarlutik allapput,  politikkikkut Ataqatigiissaarisoqatigiit aalajangertut Aaqqissuussaanermut Isumalioqatigiissitap isumaliutissiissutaani anguniagassatut, periusissatut aamma tunngaviusumik naatsorsuutigisatut siunnersuutigineqarsimasut aalajangiussimaneqassasut.

Kommuninut suliassanik aalajangersimasumik nuussisarnissat suliarineqassasut aamma erseqqissaatigineqarpoq, taamatullu sulineq 2016-ip ingerlanerani aalajangersimasumik suliniutinut siunnersuutitut piviusunngortinneqassasoq.

Aamma atuaruk Suliffinnik nuutsitsinissamut siunnersuut Demokraatinit Atassummiillu akueriumaneqanngilaq