NUUMMIIT NUUNNEQ Suliffinnik nuutsitsinissamut siunnersuut Demokraatinit Atassummiillu akueriumaneqanngilaq
Namminersorlutik Oqartussat ataanniittut suliffiit 600-t Nuummit illoqarfinnut allanut nuunneqarnissaannik, aammalu aaqqissuussaanermik aaqqissuusseqqinnerup aallartinneqaqqinnissaanik Kommuneqarfik Sermersuup avataani kommunini borgmesterit siunnersuutigaat.
Tamannalu partiini naalakkersuisuutitaqartuni annersaasup, Siumup tapersersorlugu pingasunngormat nalunaarutigaa.
Partiilli naalakkersuisuutitaqartut sinneri borgmesterit siunnersuutaannut isumaqataanngillat.
- Ukua (nuutsitsinerit, aaqq.) qanoq akeqassanersut aningaasaqarnikkut tunngavilersorneqanngillat. Taamaammat pimoorussisutut taaneqarsinnaanngitsut, Randi Vestergaard Evaldsen suliffinnik nuutsitsinissamut siunnersuut pillugu KNR-imut oqarpoq.
Aamma atuaruk Suliffinnik nuutsitsinissat qanoq akeqassanersut suli missingersorneqanngillat
Borgmesterillu siunnersuutaat Atassummit aamma akerlilersorneqarpoq.
- Suliffinnik, illoqarfimmiit illoqarfimmut nutserinerinerit, Nunatta aningaasaataanik nutaanik pilersitsinavianngillat. Naamik. Akerlianilli aningaasartuutinik pilersitsisussaapput, Atassutip siulittaasuata tullia Steen Lynge oqarpoq.
Siunnersuutillu qanoq akeqarnissaanik missingersuusiortoqarsimannginnera Atassutip Demokraatillu ingammik iluarinngilaat.
- Aammalu sulisoqarnerup ilisimasaqarnerullu tungaatigut annaasassat, tamakkualuunniit nalilersorneqanngillat. Demokraatit nuutsitsinissanut tunngaviusumik akerliunngillat, kisianni aningaasatigut inuiaqatigiinnullu sunniutissaat suussanersut misissorneqarnissaat pingaartilluinnarparput, Randi Vestergaard Evaldsen oqarpoq.
Aamma atuaruk GE: Suliffiit nuunneqarnissaat ineriartortitsiviussanngilaq
Nuup avataani illoqarfiit ineriartortinneqalissappata amerlanernillu suliffeqalissappata inuussutissarsiutinik nutaanik pilersitsisoqartariaqartoq, Steen Lynge isumaqarpoq.
- Mittarfiliornikkut inuiaqatigiit inuussutissanik ingerlatsisut atugarissaarnerulersinnissaannut pilersitsissaagut, taamaasillutalu takornariaqarneq annertusarlugu, Steen Lynge oqarpoq.
Namminersorlutik Oqartussat akisussaaffiinik kommuninut nuutsitsisoqarnerussasoq, borgmesterit aamma piumasaraat.
Aamma atuaruk Borgmesterit: Atorfiit Nuummit nussornerisigut Nunarput naligiinnerulersinneqassaaq
Tamanna Randi Vestergaard Evaldsenip akerlerinngilaa. Isumaqarporli, kommunit akisussaaffimmik annerusumik tigusisinnaassanersut misissorneqaqqaartariaqartoq.
- Uku misissorneqarnissai pingaarluinnaqqissaarpoq. Nuussuiniaannarluta aamma nuussuisinnaannginnatta. Suut nuutassaassanersut misissorluaqqissaartariaqarput, aammalu ilumut tunngavissaqarnersoq, Demokraatit siulittaasuat Randi Vestergaard Evaldsen oqarpoq.
Suliffinnik nuutsitsinerup qanoq akeqarnissaa suli missingersuusiorneqanngitsoq, Qeqqata Kommuniani borgmesteri Hermann Berthelsen oqareerpoq.
- Naalakkersuisunit Inatsisartuniillu akuerineqarpat, taava missingersuutit allallu tamakku suliarineqarumaarput, Hermann Berthelsen KNR-imut pingasunngormat oqarpoq.