NUUMMIT NUUNNEQ Suliffinnik nussuinissamik pilersaarutit Siumumit taperserneqartut

Borgmesterit siunnersuutertik nalunaarusiami "Naligiimmik siunissaqarneq" ippassaq tusagassiortunik katersortitsinerminni marlunngornermi saqqummiuppaat.

Siumut Politikkikkut oqaaseqartartuat, Jens-Erik Kirkegaard borgmesterit saqqummiussaat amigaateqartoq ippassaq oqarpoq.

Borgmesterilli siunnersuutaat oqallissiaasoq Jens Immanuelsen isumaqarpoq.

- Uanga isumaqanngilanga pinngitsooratik taakkua anguniarneqassasut. Oqallinnermununa kommuninut nutserneqarsinnaasut pillugit suliaq aallartinneqartariaqarneranut oqariartornermut taakkua tunngavissatut saqqummiunneqartut, Jens Immanuelsen taama oqarpoq.

Aamma atuaruk GE: Suliffiit nuunneqarnissaat ineriartortitsiviussanngillat

Borgmesterit siunnersuutertik tusagassiortunik katersortitsinerminni ippassaq saqqummiummassuk, Siumup politikkikkut oqaaseqartartua Jens-Erik Kirkegaard peqataasunut ilaavoq.

Taannalu saqqummiussamut oqalliseqataanissaminut soqutiginnippoq, borgmesterilli siunnersuutaat amigaateqartoq Jens-Erik Kirkegaard isumaqarpoq.

- Nalunaarusiaq annertoorujussuarnik imaqarpoq, kisianni aamma amigaateqarpoq, soorlu nuutsitsinerit qanoq akeqassanersut. Taavalu aamma suliffinni pineqartuni sulisut ilaat aamma ueqarlutillu nuliaqarput, immaqalu amerlasuut meeraqarlutik. Taakkualu nuussappata qanoq iliuuseqartoqarniarnersoq amigaataavoq. Kisianni aamma nuukkusussanngippata taava nutaanik sulisussarsiornissaq qanoq qulakkeerneqassava? Suli apeqquterpassuupput oqallinnerup ingerlaqqinnerani oqaluuserineqartariaqartut akineqartariaqartullu, Jens-Erik Kirkegaard marlunngornermi  oqarpoq.

Aamma atuaruk Suliffinnik nuutsitsinissat qanoq akeqassanersut suli missingersorneqanngillat

Amigaatilli kingusinnerusukkut oqallisigineqarpata ajunnginnerussasoq, Jens Immanuelsen isumaqarpoq.

- Isumaqatigiinniarnerinukua aallartinneqartariaqarnerannut kaammattuisoqartoq. Aamma inuiaqatigiinni oqalliseriaaserput uunga sangutikkiartuaartariaqaripput isumaqarpunga. Ajornartorsiutit aallaavigalugit oqallinneq, oqallinnerit ingerlaneranni tikissaqqaarparput. Kisianni tunngavissatut saqqummiunneqartut aallaavigalugit oqallinneq, aamma politikkikkut ukiut arlalinngortuni siunnerfiusut sulilu suliarineqanngitsut aallaavigalugit oqallinneq isumaqatiginninniarnerillu aallartinneqartariaqarput, Jens Immanuelsen oqarpoq, nangillunilu.

- Taamaattumik maannakkut oqareersinnaanngilagut nakorsaaneqarfik Uummannamiittussaq, ilaalu oqaatigineqartut ilanngullugit. Isumaqatigiinniarnerit tamakkua aqqusaarneqarsimatinnagit oqaatigereerneq ajornaqaat, Siumumi Inatsisartut gruppianni siulittaasoq, Jens Immanuelsen oqarpoq.

Aamma atuaruk Borgmesterit: Atorfiit Nuummit nussornerisigut Nunarput naligiinnerulersinneqassaaq

Aamma atuaruk Suliffiit 600-t nuunneqarnissaannik siunnersuut