NUUMMIIT NUUNNEQ Borgmesterit: Atorfiit Nuummit nussornerisigut Nunarput naligiinnerulersinneqassaaq

Kommunillu naligiinnerusunik atugaqarnissaat siunertaralugu Namminersorlutik Oqartussani suliffiit Nuummiittut 600-t sinerissap sinneranut nuussornissaannik siunnersuut, ullumi marlunngornermi tusagassiortunik katersortitsinermi saqqummiuppaat.

Borgmesterit taama saqqummiussinerat Jens-Erik Kirkegaardip Siumumeersup tusaqqammeraluarlugu suli amigaateqartoq takusinnaavaa. Taamaattoq oqallinnermut tapiilluassasoq taanna isumaqarpoq.

- Tikilluaqqunarpoq assut, aamma soqutiginarpoq oqallisigissallugu nunatta ukiuni aggersuni siuariartornissaa eqqarsaatigalugu qanoq aqqutissiisoqarsinnaanersoq, Jens-Erik Kirkegaard taama oqarpoq.

Kommunit assigiinngitsut akornanni inuussutissarsiornikkut, suliffeqarnikkut innuttaasutigullu nikinganerat akiorniarlugu Namminersorlutik Oqartussat atorfiutaasa Nuummiittut 600-t nuunneqarnissaat, Qaasuitsup Kommuniani, Qeqqata Kommuniani Kommune Kujallermilu borgmesterit siunnersuutigaat.

Aamma atuaruk Suliffiit 600-t nuunneqarnissaannik siunnersuut

Borgmesterit nalunaarusiap tunngavigineqartup imarisai ullumi tusagassiortunik katersortitsinerminni saqqummiuppaat, tassanilu kommunini innuttaasut ilinniagaqarsimasut Nuummut nuuttarneri ilaatigut takuneqarsinnaavoq. Taamaammat sinerissami innuttaasut ikiliartuutigalutik ilinniarsimasut Nuummut annaaneqartartut, borgmesterit ilaatigut isumaqarput.

Aamma suliffeqarfiit ilinniarfeqarfiillu Nuummi amerlanerusut, illoqarfiillu pingaarnersaanni inuussutissarsiorneq ineriartortinneqarnerusoq nalunaarusiami allaqqavoq. Taamaammallu Nuup siuariartornerani sinerissami illoqarfiit arlallit kinguariartortut, borgmesterit ernumassutigaat.

Tamannalu akiorniarlugu suliffiit sinerissamut siaruarterneqarnissaat borgmesterit siunnersuutigaat.

Tusagassiortunik katersortitsinermi politikerit arlallit, partiit illuatungiliuttut ilanngullugit peqataapput. Partii Naleqqamit Per Rosing-Petersen Inuit Ataqatigiinniillu Aqqaluaq B. Egede, borgmesterit sinerissami illoqarfiit siuarsarnissaannik siunnersuutaannut akuersaarput.

Borgmesterillu oqallissaarinerannut tikilluaqqusigaluarluni Jens-Erik Kirkegaardip Siumumeersup nalunaarusiaq tunngavigineqartoq amigaateqarnerarpaa.

- Nalunaarusiaq annertoorujussuarnik imaqarpoq, kisianni aamma amigaateqarpoq, soorlu qanoq akeqarnissaa. Taavalu aamma uku suliffiit pineqartut ueqarlutillu nuliaqarput, ilai immaqa amerlasuut meeraqarput, taakkununnga aamma qanoq iliuuseqarnissaq nuussappata amigaataavoq.

- Kisianni aamma nuukkusussanngippata taava nutaanik sulisussarsiornissaq, qanoq qulakkeerneqassua? Taamaammat apeqquterpassuupput aamma suli oqaluuserineqartariaqartut akineqartariaqartullu oqallinnerup ingerlaqqinnerani, Jens-Erik Kirkegaard Siumumeersoq taama oqarpoq.

Suliffeqarfinnik nussuinissamik siunnersuut 'Naligiimmik siunissaqarneq' ingerlaqqiffissaq ataaniittoq toorlugu tamakkerlugu atuarneqarsinnaavoq.