NUUMMIIT NUUNNEQ GE: Suliffiit nuunneqarnissaat ineriartortitsiviussanngilaq
Suliffeqarfiit 600-t Nuummit nuunneqarnissaannik borgmesterit pingasut siunnersuuteqarnerat Sulisitsisut Peqatigiiffiannit isornartoqartinneqarpoq.
Apeqqutit akissutissarsineqanngitsut amerlavallaarput, sulisitsisut peqatigiiffianni pisortaq Brian Buus Pedersen isumaqarpoq.
- Politikikkut suliassaq annertoorujussuuvoq, politikkikkullu suliat annertuut siunnersuutillu piviusunngortinneqarnissaat pitinnagu ilisimasat naammattut, ilimagineqartut, susoqassanersorlu ilisimaneqartariaqarput, Sulisitsisut Peqatigiiffianni GE-mi pisortaq Brian Buus Pedersen oqarpoq, siunnersuutigineqartoq inuiaqatigiinni ineriartortitsinavianngilaq Brian isornartorsiuteqarluni taama oqarpoq.
Aamma atuaruk Suliffinnik nuutsitsinissat qanoq akeqassanersut suli missingersorneqanngillat
Suliffiit nuunneqarnerat akisoorujussuuvoq
Sulisitsisut peqatigiiffiata oqarnera naapertorlugu suliffiit pioreersut allamut nuunneqarnissaat kisimi pineqarpoq.
Nalillit allamut nuunneqarnissaat pineqarput, naleqartunilli nutaanik pilersitsinerit pineqanngillat.
- Iluanaarutigineqarsinnaasut amerlanerulersittariaqarpagut, tamanna silatoorpassuarnit oqaatigineqartareerpoq, tamannalu pineqartariaqartoq isumaqarpugut.
Danskit naalakkersuisuisa oktobarimi nalunaarutigaat, suliffiit Københavnimittut 3900-t Danmarkip sinneranut nuunneqassasut.
Naalakkersuisut oqaaseqaataanni, danskit aviisiata Politikenip allagaatinik takunnissinnaatitaanermit pissarsiarisimasaani, atorfilittanit erseqqissaatigineqarsimavoq, isumannaallisaanermut aqutsisoqarfik Københavnimit Esbjergimut 2004-mi nuunneqarmat aningaasanut inatsimmi 40 millionit koruunit aningaasaliisoqartariaqarsimasoq - tassa allatut oqaatigalugu suliffiup ataatsip nuunnera 500.000 koruuninik naleqarpoq.
Brian Buus Pedersenip isumakuluutigaa, suliffiit nuunneqarnerat akiisoorujussuussasoq, sulisitsisut peqatigiiffiata isumaa naapertorlugu aningaasat taakkua ajunnginnerujussuarnut atorneqarsinnaammata.
- Ersarinnerulaalersillugu saqqummiukkaanni oqartoqarsinaavoq, makkua periarfissaappaat?
Aamma atuaruk Borgmesterit: Atorfiit Nuummit nussornerisigut Nunarput naligiinnerulersinneqassaaq
Aamma atuaruk Suliffiit 600-t nuunneqarnissaannik siunnersuut
Ineriartorneq inuiaqatigiinnut tamarmut iluaqutaasaaq
- Aningaasat milliardilikkuutaat atorlugit suliffinnik nussortitsissaagut nalunagu uffa, nunamut tamarmut iluanaarutaanngitsumik? Imaluunniit inuiaqatigiit tamarmik pissaqarnerulissutigisassaannik milliardit koruunit atorlugit kabeli immap naqqatigoortoq tallerusunneruarput mittarfinnillu nutaanik sanaartorluta, sulisitsisut peqatigiiffianni pisortaq Brian Buus Pedersen aperivoq.
Nuup avataani ineriartortitsisoqarnissaa GE-mit assortorniarneqanngilaq, Brian Buus Pedersenilli isumaa naapertorlugu ilimanaateqartut atorneqanngitsut arlaqartut atorluarneqarsinnaapput.
Aalisarneq ingerlalluartoq atorluarnerusinnaavarput, takornariat amerlanerusariaqarput sanaartukkallu ajunnginnerusariaqarput.
- Meeqqat atuarfiini atuartut pikkorissut aallunnerusariaqarpagut inuussutissarsiutinik ilinniagaqarfinnut ingerlaqqinniassammata, Sulisitsisut Peqatigiiffianni GE-mi pisortaq Brian Buus Pedersen oqarpoq.
