Asii: Qaa, aallartinniaritsi
Kommuneqarfik Sermersuumi borgmesteri Asii Chemnitz Narup (IA) taama isumaqarpoq.
Kommunini suliassaqarfiit aaqqissuuteqqinneqarnerisa 2015-imi naliliiffigineqarsimanerat tusagassiorfinnut nalunaaruteqarluni eqqaasitsissutigaa. Namminersorlutik Oqartussanit kommuninut suliassaqarfinnik nuussuinerup unittoorsimanera pissutigalugu iluaqutaasinnaasutut naatsorsuutigisaasimasut amerlanerpaartaat piviusunngunngitsoorsimasut tassani tikkuarneqarput.
Nunatsinnilu kommunit sisamaasut akornanni ullumikkut isumaqatigiinnginnerujussuarmut tamanna aamma peqqutaaqataasinnaasoq Asii Chemnitz Narupip oqaatigaa.
- Namminersorlutik Oqartussanit kommuninut suliassaqarfinnik nussuinerup nassatarissavaa sullissineq pitsaanerusoq aamma innuttaasunut neqeroorutit imminnut ataqatigiinnerusut. Aalajangiinissanik ingerlatseriaatsit amerlasuut ajornannginnerulissapput, tamatumunngalu peqatigitillugu kommuninut ullumikkut pisortaqarfiit suliffeqarfiutaannik amerlanernik peqalernissamik kissaateqartunut ikiorsiissutaassalluni, Sermersuumi borgmesteri oqarpoq.
Aamma atuaruk KANUKOKA-mi pisortaq: Aaqqissuusseqqinnermi suliaq uninngavoq
Susassaqarfiit 40-t kommuninut nuunneqartussatut inassutigineqartut ilaminiinnanngui maannamut nuunneqarsimapput. Tamannalu KANUKOKA-p maanna siornatigullu pisortarisaanit Kommuneqarfik Sermersuullu avataani kommuninit pingasuusunit isornartorsiorneqarpoq.
Asii Chemnitz Naruppilu utaqqikatattunut aamma ilannguppoq:
- Oqarusuppunga: Qaa, aallartinniaritsi. Kommunit 18-iusimasut sisamanngorlugit kattunneqarput suliassanik nuussinissarpiaq anguniarlugu. Kommuneqarfik Sermersuumi akisussaaffinnik amerlanerusunik tigusinissaq piareersimaffigaarput, Namminersorlutik Oqartussat kisiisa utaqqivagut, Asii Chemnitz Narup taama oqarpoq.
