Katersugaasivik Knud Rasmussenimut tunngasoq nutaaq Danmarkimi

Knud Rasmussenip Illuani Hundestedimiittumi ukiut pingasut matuma siorna issittumi ilisimasassarsiortartup allaffigisimasaani ikuallattoqarmat matusariaqarsimavoq.

Ikuallattoqareersoq ammaqqinneqarmat katersugaasivimmut soqutiginninneq suli annerulersimasoq, pisortaa Søren La Cour oqarpoq.

Aamma atuaruk Knud Rasmussenip illua ikuallaleraluartoq

Illu amerlingaluttuinnartunik ornigarneqartuarpoq. Tamanna peqquteqarpoq inuttaa suli alutorineqarluni ukkatarineqarmat, aammali aamma Issittup assorsuaq soqutigineqarnera.

Taamaattumik katersugaasivimmik aqutsisut maanna nutaarluinnarmik katersugaasiviliorniarlutik eqqarsalerput, Knud Rasmussenip inuuneranik allanillu oqaluttuartussamik.

- Katersugaasiviup nutaap annerusumik ilisimaneqalersissavaa, Danmarkip Nunattalu oqaluttuarisaanermi ataatsimut tunuliaqutaat. Kalaallit Nunaat nutaaliaasoq, Danmarkillu Nunattalu nutaaliaasumik suleqatigiinnerat ilisarineqalersillugu, ilaatigut Knud Rasmussen aqqutigalugu pinngorsimasoq.

Hundested Halsnæs Kommunimiippoq, illoqarfiup umiarsualiviani nutaamik katersugaasiviliassap inissinneqarfigisinnaasaanik maannamut kommuni millioner koruunit affaanik aningaasaliisimavoq. Tamannalu Søren La Courip pilersaarummut assut soqutiginninnertut paasivaa.

Saneqqunneqarsinnaanngitsumik sunniuteqarpoq
Knud Rasmussenimi siunissamut isigisuusimavoq.

- Takusinnaasimavaa ineriartornermi saneqqunneqarsinnaanngitsumik nunat killiit Issittumi teqeqqut tamaasa tikikkumaaraat sunniuteqarfigalugillu. Anguniagarisimallugulu nutaamut ikaarsaariarnissaq annernannginnerpaamik piumaartoq.

Ullutsinni tamanna suli ingerlavoq, imaatigut angallavissat nutaat, sermersuaq aattoq aatsitassallu sammeqqusut, Søren La Cour oqarpoq.

- Issittumi siornatigut ilisimasimanngisatsinnik silarsuaq nutaaq ammarpoq.

Ukiortaareersimalerpat misissueqqaarnerit siulliit ingerlanneqassapput. Taamaaliortoqareerpat katersugaasiviup nutaap sananeqarnissaanut qinnuteqarluni aningaasannanniarneqassaaq.