Knud Rasmussenip illua ikuallaleraluartoq
Tamatumuuna asuliinnaq kalerrisaarisoqanngilaq. Illup uiguani avannarlermi Kunuunnguup Inaanik taaneqartartup qulaani ikuallalersimavoq, qatserisartullu nalunaaquttap akunneri marluk sinnerlugit qatseriniarsaripput. Anorip sammivia ajunngikkallartillugu inneq illup sinneranut siaruaatinngilaq. Tamanna Frederiksborg Amts Aviisimi allaaserineqarpoq.
Kunuunnguup Inaa Knud Rasmussenip sullivigisimavaa, taannalu illumi tassaalluni ini allanngortiterneqanngingajassimasoq.
- Ini taanna Kunuunguup 1933-mi qimannerasulli isikkoqarpoq, Knud Rasmussenip Illuani, Katersugaasivimmilu, Frederiksværkimi, pisortaq, Frank Allan Rasmussen, aviisimut Frederiksborg Amts Aviisimut oqarpoq.
Qatserisartut sulinerat Frank Allan Rasmussenip nersualaarpaa, innermi qalianiit inimut Knud Rasmussenip sulliavianut taakku siaruatsaalivaat. Qatserisartut naatsorsuutigaat Illup uigua ikuallannerup ajoqusigaa iluarsaanneqareerluni upernaaru ammaqqissinnaassasoq.