Kujataata sikoqarnerujussua angallannermut akornusiivoq
Disko Linep angallatini sukkasuuliaq Targa umiarsuaaqqamik sisaasumik Aviaq Ittummik taarsertariaqarsimavaa.
Sikooqimmalli Aviaq Ittuk ingerlariaqqissinaanani Qaqortumut ippassaq utiinnartariaqarsimavoq.
- Sikoqarnerujussua pissutigalugu Narsarsuarmukaassisinnaanngilagut. Tassalu ilaasut ilarpassuinut tamanna ajoraluartumik kinguaattoornermik kinguneqarpoq, Disko Linemi pisortaq Noëlle Simoud allappoq.
Taanna oqaluttuarpoq, qulimiguulimmik atunngitsumik piareersimasoqanngitsoq. Kisianni sivisunerusumik timmisartuussilersimapput, amerlanerit apuuffissaminnut apuunniassammata.
Aamma angallatinut billettisisinnaaneq pissutsit iluarsinissaannut unippoq.
Sikuunera amerlasuut angalanissaannik allanngortitsivoq
Aamma Narsarsuarmit Qaqortumut Narsamullu qulimiguulimmik angalasussanut. Tassami qulimiguulik Narsarsuarmit sinerissami illoqarfinnut angallassinermut salliutillugu atorneqassaaq.
Taamaammat angalasut umiarsuarmit timmisartumut nuuttariaqartarsinnaapput, paarlattuanilluunniit. Taavalu aamma aqqutaani unnuisariaqartarsinnaapput.
Ilaasut nunatsinni najugaqartut Narsarsuarmiittut, Narsamiittut, Qaqortumiittut Nanortalimmiittulluunnit ineqarnissaminnut nerisaqarnissaminnulluunniit akiliunneqassapput, tamakkununngaluunniit atugassaminnik aningaasanik tunineqarlutik.
