Iqalunni nangeqattaartuliaq iluatsilluartoq naggueqatigiinnik inunnik qungujutsitsissaaq
Uniarpungaat qalipaatigissut, puisip amia, sapannganik iverusiat takisuut – seqinnarissumilu aarrup usuanik anaaleruserluni baseballerneq.
Netfliximi nangeqattaartuliami North of North-imi nunami Issittumiinneq apeqquserneqarsinnaanngilaq. Nangeqattaartuliaq Nunavumi Iqalunni pivoq, qaammat kingulleq aallakaatinneqaqqaartoq. Tassani anaanaq inuusuttoq Siaja, uini nuannarineqarluartoq Ting-ip qimannerata kingorna, inuiaqatigiinni ingerlariaqqinnissaminut aqqutissaminik ujartuinera malinnaavigineqarpoq.
Quiasaarusiaq Netflix-imi sukkasuumik nuannarineqarnerpaanngorpoq. Takutinneqaqqaarneraniit ullut siulliit qaangiutiinnartut 3 millioninit ikinnerunngitsunit isiginnaarneqarsimavoq.
Tassungali ilitsersuisunut Alethea Arnaquq-Barilimut aamma Stacey Aglok MacDonaldimut, oqaluttuap naggueqatigiit inuit akornanni nuannaarnermik illarnermillu pilersitsinissaa pingaarneruvoq.
- Alutornartunik tanngassimaarutigisatsinnik filmilioreernikuuvugut, suliarinerili aamma ajornakusoornikooqaat. Nuannaajallannartunik inuit isiginnaarsinnaasaannik, illarfigisinnaasaannik inuunittalu nuannersortaannik nalliuttorsiutigisinnaasatsinnik filmiliornissarput kissaatigingaarnikuuarput, Alethea Arnaquq-Baril oqarpoq.
Oqaluttuarisaanitta ilaa
Ilitsersuisut Iqalunni sanileriillutik ukiorpassuarni najugaqarput. Taamaammat North of North filmiliarinialeramikku inuunermi piviusumit isumassarsiornikuupputtaaq.
Siajap Sassuma arnaa takorluuilluni oqaloqatigisarpaa. Illoqarfiup utoqqartaannut unnussiuaarnernik aaqqissuisuusarpoq, kissaatigisamisulli naammassineq ajortunik. Illoqarfiullu mittarfeeranngua qaninniarujoorfissanik nutaanik Tinderimiit nassaarfiunerusarpoq.
Nunasiaataanermit oqaluttuarisaanermeersunik misigisimasanik annernartunik aamma takutitsivoq. Oqaluttuarisaneq ullumikkumut suli sunniuteqartoq. Meeqqanik pinngitsaaliissummik arsaarinninnerit. Pinngitsaaliissummik atuarfimmut ilinniartut ineqarfigalugulu nerisaqarfianniititaaneq. Oqaatsinik annaasaqarneq. Imigassamik atornerluineq. Kingunerluutit kingorngunneqartut.
Apeqqut tassaavoq, qanoq ililluni oqaluttuarisaanermi taamaattumi quiasaarut inissaqartinneqarsinnaava?
- ‘Avataaniit’ isiginnaartuulluni ilungersunartorujussuullunilu annilaarnartorujussuuvoq. Tamannalu inuiaqatigiitsinni anniarnermik pilersitsivoq, Stacey Aglok MacDonald oqarpoq nangillunilu:
- Naggueqatigiillu inuttut oqaluttuarisaanitsinnut inuunermilu atukkatsinnut aamma ilaapput. Misigisimasatsinnik artornartunik ikinngutivut oqaluutileraangatsigit illarlutalu quisaakulasarpugut. Ilaannimi illaannartariaqartaratta. Atornartuugaluaraangataluunniit.
Ilungersunartuminngarnit suli peqarnerusoq
Misigisat artornartut ilungersunartullu ilanngutissanngikkunik piviusorsiortuunngitsortaaq ilitsersuisuusut isumaqarput. Tamakkuummatami ullumikkut inuiaqatigiit ilusilersugaanerannut ilaasut.
Alethea Arnaquq-Baril nangippoq:
- Kikkuunerput inuunitsinnilu qanoq kissaateqarnerput ukkatarivarput, pingaarnertullu inuttarititatta ullutsinni inuk-tut inuunerup qanoq inneranik apeqqusiisutut inissisimavoq. Aamma nunasiaataanerup kingunerluutai taassuma (Siaja, aaqq.) inuunermini misigisimasaasa ilarivaat, tamakkuli kisiisa inuunerinngilai.
- Kingunerluutimmi inuunitta ilaagaat, taakkunanngali suli misigisaqarneruvugut. Misiginikuusagummiuku aqqusaarlugit suliarisariaqakkavut neriullutalu oqiliartuutigisinnaassallutigit, taanna oqarpoq.
Inuiaat ataatsit
Taamaammat kinguaariit misiginikuusamik kingunerinik oqiliartortut pillugit ilitsersuisuusut itisiliiffigaat. Pingaartumik inuttat taakku marluk, Siaja arnaatalu akornanni atassuteqarnerat, inuiaqatigiinnilu inukitsunnguami ataatsimoorneq misigisaat pineqarput.
- Kinaassutsip ujartornerani nunarsuarmullu takutissinnaanera oqaannarnermiit ajornarneruvoq, pingaarnertullu inuttarititatta Siajap tukangaatsiartumik kisiannilu aliikkusersorfiulluartumillu takutikkaa isumaqarpunga, Alethea Arnaquq-Baril oqarpoq.
Nangeqattaartuliap nunani assigiinngitsuni naggueqatigiit inuit ataatsimuulersissinnaassagaat ilitsersuisut neriuutigaattaaq. Ilaatigut isumassarsiutigalugit maani nunatsinni nuannarineqarluartut nipilersortartut, soorlu Josef Tarrak aamma Varna nangeqattaartuliami tusaaneqarsinnaapput.
Issittormiuusugut akunnitsinni suleqatigiinnerusinnaasariaqartugut, Stacey Aglok MacDonald aamma Alethea Arnaquq-Baril isumaqarput.
- Nunasiaataanerup nunanik killilersueriaasianik nungusaaniarnissaq nassaarisariaqarparput, naak oqaatsitta kulturittalu sumiifikkaartumik assigiinngiffeqaraluartut, inuiaajuvugt ataasiulluta, suleqatigiinnitsigullu kusanartorujussuarnik pilersitsisinnaavugut, Alethea Arnaquq-Baril oqarpoq.
