Donnas Dyreklinik-ip matunissaa pinngitsoortinneqartoq

Nuummi Donnas Dyreklinikki sulisussaaleqinerup kingunerisaanik matunissamut aarlerinartorsiorfimmeereerluni, siunissaq maanna qaamaneruleqqavoq.

KNR-i julip aallartinnerani Donnas Dyreklinikkip sulisussaaleqinerata kingunerisaanik matunissamut aarlerinartumiinnera nutaarsiassiissutigivaa. Nunatsinnili uumasunut nakorsiartarfik matusariaqarunnaarpasippoq. Tamanna nakorsiartarfimmi ittoq Tom Amtoftip nuannaarluni uppernarsarsinnaavaa.

- Ujaasinitsigut ukiup sinnerani uumasup nakorsaanik, minnerpaamik ataatsimik, inuttaqarnissaq qulakkeerparput. Uumasullu nakorsai marlunnik ilaneqarnissaat aamma suliniutigaarput. Taakku 2026-mi januaarip aallartinnerani immaqa tamaangarusussapput. Suli inissivinneqanngilaq, kisianni pissanganarpoq iluatsinnissaalu neriuutigaara, taanna oqarpoq. 

Uumasut nakorsiartarfianni uumasut nakorsaat Odderimeersoq massakkorpiaq sulivoq, taanna aggustip 18-iata tungaanut ikiuuppoq. Tamatuma kingorna  uumasut nakorsai ukiup sinnera paarlakaallutik ikiuukkiartortalinnginneranni, ulluni 14-ini uumasut nakorsaqanngikkallassaaq. 

Illoqarfimmiuniit tapersersuineq annertooq piumassusinitsitsivoq

Matunissamut aarlerinartumiinneq pillugu nutaarsiassiisoqarmalli, atuisut ernumasut, qujaniarlutik nakorsiartarfimmut aqqusaartarsimapput. Inuit sukkulaatinik kaaginillu pajukkiartortarsimapput arlallillu aningaasanik tuniussisimallutik, Tom Amtoft oqarpoq. 

- Taamaattumik manga nammineq inuttut nukissanillunga ingerlarsorusuummerpunga, inuit taamatut ornigullutik qujassuteqarmata. Soorunalimi suli uippakajaanarpoq, aalaakkaasumik atugassaqartinissaq angorusunnarami. Tamannali angunissaata tungaanut taamatut ingerlaniarsarisariaqarpugut. 

Donnas Dyreklinik ukiut 12-it sinnerlugit Nuummi uumasunik uumasuutilinnillu ikiuisarput. Naak uumasut nakorsiartarfiat siornatigut unammillernartumiittarsimagaluartoq, matunissamut aatsaat taamak aarlerinartumiissimatigaaq.  

Tom Amtoft KNR-imiit bulimi oqaluunneqarami, nakorsiartarfik qaammatini tallimani uumasut nakorsassarsiorsimagaluarpoq, ataatsimilluunniit qinnuteqarfigineqanngitsumik. Matunissamullu aarlerineq pillugu nutaarsiassaq siammarmat - qallunaallu nutaarsiassalerisuiniit aamma nutaarsiassiissutigineqarmat - ikiuukkumasoqalerpoq. 

Tamanna Donnas Dyreklinikkip Danmarkimi VetFamilyllu ikioqatigiilerneranik kinguneqarpoq. Taanna uumasunut nakorsiartarfinnut uumasunullu napparsimavinnut namminersortunut peqatigiiffissuuvoq. 

- Kalaallit Nunaanni uumasut nakorsaattut sulineq paasisaqarfigiumallugu maanga pulaarnikuupput. Danmarkimi nakorsiartarfinnut allanut sanilliulluta maani suleriaaseq allaanerulaarami tamannalu annilaanngatigineqarsinnaalluni. Taava aamma atorfimmut isumaqatigiissusiornermut tunngatillugu ikiuuttarput misissuillutik atorfinitsitsiniarnermilu oqaloqatiginnikkaangatta nakkutilliisarlutik. Qinnuteqartunut tamanna toqqissisimatsitsinerulertarpoq - pingaartumik nunamit allaminngaanniit qinnuteqaraanni. 

Sulisussarsiorneq unammillernarnerpaavoq

Kalaallit Nunaannut uumasut nakorsaattut sulinissaq pilerinarsarlugu sulisussarsiornerulli unamminartut annerpaartariuarsinnarpaat -  pingaartumik Danmarkimi uumasut nakorsaannik amigaateqartoqareertillugu.   

- Danmarkimimi illoqarfimmut allamut nuunneq Kalaallit Nunaannut 4.000 kilometerinik ungasitsigisumut nuunnermiit naleqqiullugu ajornannginnerujuaannarami, Tom Amtoft oqarpoq. 

Kalaallit Nunaannullu nuunnissamik aalajangernerup imaannaanngitsuunera paasisinnaavaa. Ungasissutsilli unamminartullu kisimik pineqannginnerat takutikkusuppaa - aamma misigisaqarfiusinnaavoq suliatigut eqqissinartoq, allatut isiginnissinnaassuseqalersitsisoq imminullu qanigiilluni ataatsimoorfik.

- Uumasut nakorsaat tamaaniinnikut eqqissisimanarnerunerarlugu tamarmik assigiimmik oqalupput. Danmarkimi suliassat akulikinnerummata tuaviorlutik naammassiniartariaqartarput tamannalu uippakajaarnarneruvoq. Tamaani taamaatsikkusunngilarput.

- Siunissami qinnuteqartussat uumasut pillugit imatut pinerput nalunnginninnissaat pingaaruteqarpoq. Tamanna aamma nakorsiartarfimmi silaannarmik aallaanerulluinnartitseqataavoq maaniinnissamik orniginartitsisumik. Uumasut nakorsaallu maaniinnikut imminut piffissaqarfiginerulaarnerat maluginiarpara. Suliassallu torersumik suliarinissaannut piffissaqarlutik,  Tom Amtoft oqarpoq.

Suliffik itisilerinissamut piffissaqarfiusoq

Donnas Dyrekliniki piffissaqarnarpoq – sulinerup tungaatigut sunngiffimmilu, Tom Amtoft erseqqissaavoq. 

Tamanna isumaqarpoq, suliani itisilerinissamut misileraanissamullu inissaqartitsineq - misissugassannguilluni aaviineq immikkuullarissoq mikroskopimik takusassaq pineqarpat nutaamilluunniit ilikkarusunneq pineqarpat. 

Ataatsimoortarnerlu sulinerup avataani aamma pisarpoq, suleqatigiit susassaqartitsinernut assigiinngitsunut akulikitsumik naapisimaartarlutik. 

Tom Amtoftimmi oqarneratut, Kalaallit Nunaanni uumasut nakorsaattut inuuneq misigiumagaanni nakorsiartarfiup annertuumik tunniussisinnaanissaa pingaaruteqarpoq. 

Taamaattumik aalaakkaasumik aaqqiineq suli anguneqanngikkaluartoq, Nuummi nakorsiartarfeeqqamut tungujortumut siunissaq neriuuteqalersitsivoq - atuisut uumasullu nakorsaat ikiuinerat ingerlaannartillugu. 

- Atuisut suliniummut tapersersuiuarnissaat kiisalu uumasut nakorsaannut maaniinnissaq pilerinarsartuarsinnaassagipput neriuutigaara.

- Taavalu isumaqarpunga, kalaallit inuusuttaannut Danmarkimi uumasut nakorsanngorniarlutik ilinniartunut suliffeqartitsinissaq pisussaaffigigipput isumaqarpunga. Taakku ilaat maaniitiinnarsinnaanissaat siunissamut neriuutigisama annerpaat ilagaat.