Tunumi politikerit avissaartuuttut: Qinersisitsineq kaffisoqatigiiutaaluunniit oqaloqatigiinneq

Tunu.

Oqaaseq taaginnarlugu misigissutsit takorluukkallu assiliatut ittut pilersippai. 

Tasiilami martsimi takutitsilluni ingerlaaqatigiittoqarpoq ima oqaasertalerlugu: "Naammaleqaaq". Innuttaasut nunap sinneraniit isiginngitsuusaarneqartutut misigisimallutik, taamani akerliussutsimik takutitsipput.

Ingerlaaqatigiilluni takutitsinermik aaqqissuusseqataasup, Iddimanngiiu Jensen Biancop taamani ilaatigut eqqaavai, angallannerup tungaatigut periarfissalunneq, internetimut attavilunneq, meeqqat atuarfianni ilinniartitsisussaaleqineq, inissiat amigartut suliffissallu amigartut.

KNR-imiit sapaatip akunnerata matuma siorna oqaluttuarineqarpoq, Mike Nicolaisen nulianilu Anette Tasiilameersut partiimik nutaamik aallartitsinialikkersaartut, Kommuneqarfik Sermersuumiit avissaavinnissaq piinnarnagu Kalaallit Nunaanniilli avissaavinnissamik piumasaqartoq. 

KNR-imiit Justus Hansen (D) aamma Mala Høy Kuko (S) oqaloqatigineqarput. Taakku marluullutik Kommuneqarfik Sermersuumi politikeriupput; tamarmillu Tasiilaminngaanneerput.

Kommunemiit isiginngitsuusaarneqarneq

Mala Høy Kukop sanaartornerulertoqarnissaa piumasaralugu kommunalbestyrelsemi ilaasortaqatiminut kimigiisersimalluni oqarpoq, inissianik amerlanerusunik sanaartortoqarniassammat nunaqarfiullu Sermiligaap piujuarnissaa anguniarlugu, nutaamik aalisakkanik tunisassiorfiliortoqarniassammat. 

Suleqatiminiilli itigartitaasutut misigisimavoq. 

- Arlalippassuariarluta tusaaneqanngitsutut misigisimasarpugut. Kommunalbestyrelsemut siunnersuuterpassuarnik apuussisarpugut, itigartitaasaqaagulli. Amerlavallaanik.

 Nutaanillu sanaartortoqarnissaanut piumasaanut aningaasaqarniarnerup aporfiusarnera misigisimavoq. 

Justus Hansenilli pisumut allatut isiginnittaaseqarpoq. Taanna isumaqarpoq, Naalakkersuisut Kommuneqarfik Sermersoorlu tusarnaarusuttorujussuusut Tunulu ineriartortikkusukkaat. 

Tasiilami maanna inissianik 14-inik nutaanik sanaartortoqarnera ssersuusiutigalugu taavaa.

- Tunngavilersuutiginiarneqartumik suna anguniarneqarnersoq paasinngilara. Sulianik aallartitsisoqarnikuuvoq siunissamilu siammasinnerusumi aamma allanik aallartitsisoqaqattaassaqqaarpoq. Taamatut nuannarinnitseqarniaannarluni nipituuliorluni pissusilersorneq isumassaqartippallaanngilara. Isumaqarpunga sorpassuarnik tunngaveqanngitsunik oqaaseqaqattaannginnermi, kommunemi naalakkersuisunilu sulinissamut tunngaviusumik isumaqatigiissutit atuaqqaarneqartariaqartut, Justus Hansen oqarpoq.

Tulliani qinersisoqannginnerani taasisitsisoqassasoq

Mala Høy Kúko (S) oqarpoq, qinersisoqaqqinnginnerani Kommuneqarfik Sermersummiit avissaavinnissamut tapersiisut qanoq amerlatigineri paasisaqarfigiumallugu,  Tunumi taasisitsisoqassasoq. Assi © : KNR

Mala Høy Kukolli paasinnittaasaa naapertorlugu, nammineq kommuneqalerneq Tunumut iluaqutaassaq.

- Naatsorsuutigaarput neriuutigalugulu, nammineq kommunenngorutta, nammineq sulerissanerluta sunillu sanaartussanerluta aalajangersinnaalissagipput, taanna oqarpoq.  

Politikererli erseqqissaavoq, innuttaasut isumaannik tusarniaaffigineqaqqaarnissaat pingaaruteqartuusoq. Taamaattumik  ukiut pingasut qaangiuppata qinersisoqannginnerani, Komuneqarfik Sermersumiit avissaavinnissaq pillugu taasisitsisoqassaaq.

- Kommune namminersortuugutta namminersortuunngikkuttaluunniit, ukiut pingasut qaangiuppata qinersissaagut. 

Taannali oqarpoq, Tunumi kommune qanoq ingerlanissaanik pilersaarusiortoqarsimanngitsoq. Tamanna pillugu naalakkersuisut siunissami tikeraarunik innuttaasunut qaammarsaassutigissagaat, paasissutissiivoq.

- Naalakkersuisut pilersaaruteqarput. Kommuneqarfik Sermersuumiit avissaavinneq qanoq naleqassanersoq, innuttaasunut ornigullutik oqaluttuarissavaat.

Tunumi kommunelioraanni Kommuneqarfik Sermersuumiillu avissaavilluni, eqqarsarpit sanaartugassanut annertuunut naammattunik aningaasassaqassallusi? 

- Isumaliutigisassarpassuaqarlunilu  eqqarsaatigisassarpassuaqarpoq. Oqaannartoqarsinnaanngilaq Kommuneqarfik Sermersuumiit anissasugut. Piffiit nutaajupput aningaasallu allaapput. Oqallisigisassarpassuaqarpugut taavalu innuttaasut sorusunnersut tusarniaavigissavagut. 

Suliffissaaleqisut amerliartorput  - eqiasunneq ilutigalugu 

Justus Hansenip (D) neriuutigivaa, innuttaasut naammagisimaarinninngitsut taassuminnga politikerinillu tunumeersunik kaffisoqatigiinnissamut aggersaajumaartut. Taamaattoqassappat naalakkersuisut Kommuneqarfik Sermersuumiillu tunumi inuuniarneq pitsanngorsaaviginiarlugu qanoq suliniuteqarnersut oqaluttuariumaarpaa.  Assi © : KNR / Markus Valentin

Kisitsisit naatsorsueqqissaartarfimmeersut naapertorlugit, ukioq manna junimeersut, Tasiilami suliffissarsiortut ukiut marluk ingerlaneranni marloriaammik amerlanerulersimapput. 2023-mi 151-iupput. Ukioq manna 305-iullutik. 

Justus Hansenilu innuttaasut arlaqartut sulilerusunngitsut avaqqunneqarsinnaanngitsut isumaqarpoq - oqallinnermi Lars Erik Gabrielsenimiit (S) kalaallit ”Dovne Robert”-iattut taaguuserneqartoq.

- Kommuni suliffissaaleqisut ikilisarniarlugit aalajaalluni iliuuseqarpoq. Inuilli 40-t missaanniittut sulilernissamut naaggaarpata ilungersunarpoq; pisortaniit ikiorsiissutinik pissarsiaqarnerusinnaasorinerat peqqutaalluni, Justus Hansen oqarpoq nangillunilu:

- Naalakkersuisut akileraartarnermut aaqqissuusseqqinneq suliniutigivaat, sulinermut ilanngaat assigisaallu, sulinissamik pilerinarsaasussaq. Namminerli sulilernissamut naaggaarsimagaanni Tunumilu susoqanngiivinnerarlugu, tamanna imminut assortorpaluttutut nipeqalaarpoq. 

SIK naapertorlugu suliffissat ikippallaarput. Suliffissaqartuuppat suliffissaaleqisut sulilersimassagaluarput, tamanna pillugu qanoq isumaqarpit?

- Nunaqavissut suliffeqarfiutaat sulisussarsiortut nalunngilara. Aalisakkerivik aallartinneqaqqammerpoq. Inuit nammineq piumassuseqarlutik sofamiit masseriarlutik aallartinnissaannut suliniuterpassuit ingerlanneqarnikuupput. 

Inuillu sulinianngikkaangata inuiaqatigiittut ineriartorneq eqqugaasarpoq, Justus Hansen oqarpoq.

- Nunaqavissut suliumannginnerat peqqutigalugu nunanit allaneersunik sulilersitsineq aamma ilungersunalaarpoq. 

Ineriartorneq pillugu oqaloqatigiinneq

Justus Hansenip Tunu pillugu oqallinnerup imarisaannut pakatsinini annippaa. Politikkikkummi aaqqissuussamik ineriartortitsineq suliniutigineqartoq nammineq takusinnaavaa. 

Naalakkersuisut naalakkersuisooqatigiittut isumaqatigiissutiminni Tasiilami Ittoqqortoormiunilu mittarfiliortoqarnissaanik suliniutit aallartisarneqarnissat pituttorsimaffigivaat.   Tassungalu Justus Hansenip eqqaavaa, internetimut mobilinullu attaveqaatit Tusassimiit pitsanngorsaavigineqaleruttortut. 

- Taamaattumik amigaataasut tassaapput umiarsuatigut angallanniarneq Pilersuisumiillu nioqqutissanik pilersorneqarneq. Taamaammat Tunumi Pilersuisup pisiniarfiutaanni pisiassatigut toqqagassat amerlisarnissaannut ineriartortitsinermi qanoq iliuuseqartoqarsinnaanera pillugu siunnersuummik aalajangigassanngortitsinikuuvunga.  

Tamakkulu oqaatigereerlugit Justus Hansenip innuttaasut naammagisimaarinninngitsuniit, nammineq Tunumilu politikerit allallu, kaffisoqatigiiutaa kinguneqartussamik oqaloqatigiumaneqassallutik - kaffisugassarlu annertuujusinnaavoq. 

- Tamattami eqqaamioreerrappugut. Kaffisoqatigiumalluta qaaqquneqariaannaavugut, kaffisorfillu ataasiinnaanani kanniusinnaavoq. Taava Facebookikkut oqallinniarsarinata qanimut oqaloqatigiissinnaavugut , Justus Hansen oqarpoq naggasiillunilu:

- Uanga piareersimalluinnarpunga.