Royal Greenland: Tasiilami aalisakkerivittaassaq suliffissaqartitsissaaq
Tasiilami aalisakkerivittaassaq illup aappaluttup qisuusup saavani napparneqarsimalerpoq. Royal Greenlandimi aappaagu apriilimi piariissangatitaminik tamaani aalisakkeriviliortitsileruttorpoq.
Aalisakkerivittaassaq aalisakkanik avammut tunisassanik qerinasuartitsiviussaaq. Aamma Tunumi aalisartunut tunitsiviussaaq.
Kisianni Tasiilaq nunatsinni suliffissaaleqiffiunerpaavoq. Tamaanimi suliffissarsiortutut nalunaarsukkat 2022-mi agguaqatigiisillugu qaammammut 150-it missiliukkajuppaat. Taakkua Tasiilap inuisa 12,6 procenteraat.
Aalisakkerivittaassaq Tasiilamiunut toqqaannartumik sunniuteqarluartussaassasoq, Royal Greenlandip tunisassiornermi pisortaa Lars Nielsen oqarpoq.
- Tasiilami suliffeqarfiit arlallit aalisakkerivittaassap piareersarneranut suleqatigilereerpagut. Suleqateqarneruleriaannarnitsinnillu kinguneqarsinnaasumik tamaaneersunik aamma sulisussarsiulersaarpugut.
Avataaneersunik sulisussarsiunngitsoq
Aalisakkerivitttaassaq arfineq-pingasut missaannik suliffissaqartitsissaaq, sisamanillu ikinnerunngitsunik maannamut sulisussarsereersimalerput.
Tasiilamiunik illoqarfiulluunniit avataaneersunik sulisoqarlusilu piginnaanngorsaaniarpisi?
- Tasiilameersuinnarnik sulisussarsiulersaarpugut, Tasiilamimi suliffissarsiortutut nalunaarsukkat amerlammata, taamaaliornissarput pissusissamisoorluinnartutut isigaarput, Lars Nielsen oqarpoq.
Aalisakkerivittaassaq ammarpat, tassani sulisut amerlassusaat aalisakkanik qanoq tulaassuisoqartiginersoq aallaavigalugu nikerarsinnaasarumaartut, taanna aamma oqarpoq.
- Tulaassuisoqarluarsimatillugu suliffissaqartitsinerusartussaassaagut.
Ilinniartitsillunilu inerisaaniartoq
Sulisussat suliassatik naammassisinnaaniassammatigit, Royal Greenland suliassaannut assigiinngitsunut ilinniartinneqarnissaannut periarfissiiniarpoq.
Assassorluni sulineq, maskiinanik passussineq qarasaasiamullu nalunaarsuineq taakkua suliassaannut ilaasut, Lars Nielsen oqarpoq.
- Sulisussat tamarmik suliassatik naammassilluarsinnaaniassammatigit, suliassaannut ilinniartinneqarnissaannik periarfississavagut. Kalaallit Nunaanni aalisakkeriviutitsinni sulisunik ilinniartitsineq pikkorissaanerlu aamma misilittagaqarfigaarput, Lars Nielsen oqarpoq.
Aalisakkerivittaassani iluatsitsiffigilluassagini Tasiilamiunullu sunniuteqarluassasoq, Royal Greenlandip neriuutigaa.
- Neriuppugut Tasiilamiut aalisartullu aalisakkerivittaassaq qujarutissagaat, aamma aalisarnerulersinnaanermut suliffissaqartitsinerunissamullu periarfissaalluartoq takusinnaagaat, taanna naggasiivoq.
