Isajasip aalisakkanik tunitsivik imminut inuusuttoqatiminullu periarfissaqarnerulersitsissasoq neriuutigaa

- Nuann' Tasiilami aalisakkanik tunitsivimmik peqalersoq.

29-nik ukiulik, Isajas Ulriksen Tasiilameersoq Tasiilami aalisakkanik tunitsivittaarnissamut atatillugu oqarpoq.

Taannami inuussutissarsiutigalugu aalisartutut piniartutullu allagartartaaqqammerpoq, taamaammat tunitsivik ammarpat saarullinnik qaleralinnillu tunisaqartalissaaq.

Isajas maanna inuusuttut ornittagaanni, Ungdoms Hus Iglomiiittarpoq. Tassani inuusuttut suliffissaqanngitsut sammisassaqartinneqarneranni peqataasarpoq.

Illoqarfik inuusuttunut suliffissaaleqiffiusoq

Nunatsinni naatsorsueqqissaartarfiup kisitsisaatai naapertorlugit, Tasiilami inuusuttut 15-it 26-llu akornanni ukioqartut affai siorna suliffissaqanngillat.

Isajas taakku ilagaat. Taamaammat tunitsiviup sulilernissaminik kinguneqarnissaa neriuutigaa.

Naalakkersuisut oqarnerat naapertorlugu aalisakkanik tunitsiviup ammarneqarnissaata tungaanut umiarsuarmik tunitsiviusinnaasumik atuutsitsisoqassaaq.

Inatsisartuni politikerit Tasiilameersunut eqqarsaatiginninnerat Isajasip aamma nuannaarutigaa:

- Nuann' Tasiilami aalisakkanik tunitsiveqalersoq, neriuppunga siunissamik tunitsivimmik annertunerusumik peqalissasoq, qaninnerusumi tunitsiveqalissammat, Isajas Ulriksen oqarpoq. 

Inuusuttut siunissaqanngitsut

Royal Greenland Kuummiuni aalisakkanik tunitsiveqarpoq, taanna Tasiilap avannamut kangianiippoq 42 kilometerisut ungasitsigisumiilluni, taamaattumik Isajas Tasiilamilu aalisartut qilanaarput taama ungasitsigisumut aalisakkanik tunisiartortarunnaassagamik.

Isajas inuusuttut ornittagaanni Iglo-mi aqutsisumit, Hans Poul Andersenimit tapersersorneqarpoq inuusuttummi suliffissaqannginnerminni amigaateqartut pisortap maluginiartarpaa. Aningaasassaaleqillutillu nerisassaaleqisarput.

Aasaanerani kitaani aalisakkanik tunisisoqarsinnaanerani Tasiilamit inuusuttut tallimanit qulinut amerlassuseqartut aallartillugit Royal Greenlandip aalisakkeriviinut suliartortinneqartartut taassuma ilanngullugu paasissutissiissutigaa.

- Soorunami malunnartarpoq akissakinneq nerisassatigullu amigaateqarlutik artorsalaartarpaluttartut. Arlallillu suliffissarsiuussisarfik aqqutigalugu kitaani aalisakkerivinni suliffissaqarnissaminnut ikiorneqartarput, Hans Poul Andersen KNR-imut oqarpoq.

Royal Greenlandip Tasiilami aalisakkerivik 2024-mi aasaanerani piariissasoq paasissutissiissutigaa.