Isumaqatigiissut: KNAPK & Royal Greenland aaqqiagiinnginnerat qaangiukkallartoq
Aalisartut KNAPK-mi ilaasortat Royal Greenlandimut apriilimi akerliussutsimik takutitsipput. Aalisartut naammaginninngitsut kiinnaanni takuneqarsinnaavoq. Taakku allagartarsuit nipisaat suaannik akerliliinermik oqariartuuteqartut tigummivaat.
KNAPK-p siulittaasua, Nikkulaat Jeremiassen torlulaartaaserluni saarlersaalluni ingerlavoq.
Ukioq ataasiunngitsorluunniit qaangiuttoq KNAPK-p Royal Greenland suleqatiginiarlugu isumaqatigiissuteqarfigaa. Suleqatigiinnermi illuatungeriit akinik isumaqatigiinniuteqannginnissartik isumaqatigiissutigaat.
Isumaqatigiissut piffissalerneqanngilaq, isumaqatigiinngittoqaqqilissappallu isumaqatigiissut atorunnaarsinneqarsinnaalluni.
Sinaakkutit nutaat nutaanik isumaqatigiinniarnertaqanngitsut
Royal Greenlandimi attaveqaqatigiinnermut pisortap, Merete Lindstrømip oqarnera naapertorlugu isumaqatigiissut imaaliallaannarlugu isumaqatigiissutigineqanngilaq, ukiullip aappaata affaani isumaqatigiinniarnerit inerneralugu.
- Suliaq ingerlaavartunik ataatsimiinnernik ataasiakkaanillu unillatsiarnernik ilaqartoq sivisuvoq. Kisianni isumaqatigiinngiffigisatsinnit ingerlaqqissagutta arlaatigut ingerlaqqissagutta oqaloqatigiittariaqartugut isumaqatigiissutigaarput.
- Oqaloqatigiinnermullu tassunga suleqatigiinnissamut isumaqatigiissut sinaakkusiivoq, Merete Lindstrøm oqarpoq.
KNAPK-p Royal Greenland akinut tunngatillugu toqqaannartumik isumaqatigiinniarusussimammagu tamanna illuatungeriit akornanni isumaqatigiinngissutaasut annerit ilagaat. Royal Greenlandillu akit niuernermit aallaaveqartumik inissinneqarnerat malillugit inisseqqarusussimavai kattuffiillu ataasiakkaat isumaqatiginerat aqqutigiumanagu.
Taamaakkaluartorli KNAPK-p isumaqatigiinniarunnaarneratigut naapeqatigiissinnaapput.
- KNAPK-p aalisartuminut akinik pitsaanerusunik pilersitsinissaq anguniagaraa, tamannalu paasisinnaalluarpara. Aamma sooq ilungersuuteqarnerat paasisinnaavara.
- Kisianni suleqatigiiffigisinnaasatsinnik aamma oqaloqatigiinnermik pilersitsinissamut pitsanngorsaanissamullu neriorsoqatigiissinnaanerput nuannaarutigilluinnarpara, Merete Lindstrøm oqarpoq.
KNAPK Royal Greenlandilu qaammammut ataatsimeeqatigiittassapput. KNAPK-mullu tassani nunani tamalaani akit sooq taamaannerat paasissutissiissutigineqartassalluni.
Aningaasaqarnerup paasisaqarfiginerulernissaa illuatungeriillu siunertaanni isumaqatigiinngittoqalinnginnerani qasukkarsimasoqarnissaa tassani siunertarineqarpoq.
- Royal Greenlandimi iliuutsigut tamarmik inuiaqatigiit pillugit iliuuserineqarput, taakku pisortamut arlaannulluunniit aningaasarsiungaatsiartumut tunngassuteqanngillat, Merete Lindstrøm.
Qaqugukkulluunniit taamaatinneqarsinnaasoq
Nikkulaat Jeremiassenip KNAPK-mi akerliliisoqannginneratigut suleqatigiinnissamik isumaqatigiissuteqartoqartoq oqaatigaa.
Isumaqatigiissulli aappaagu nipisanniarneq aallarteqqippat atorunnaarsinneqassanersoq apeqqutaaginnarpoq.
Royal Greenland aalisakkanut tunisanut akinik aalajangiinera KNAPK-mit isumaqatigineqanngikkaangat KNAPK akerliussutsimik takutitsinermik aaqqissuussisarpoq. Suleqatigiinnissamik isumaqatigiissuteqareerlusi taama pisoqaqqissinnaava?
- Taanna isumaqatigiissut soorunami atsiorneqarsimasoq soorunami atorunnaarsinneqarsinnaavoq. Isumaqatigineqanngikkuni atorunnaarsinneqarsinnaavoq, Nikkulaat Jeremiassen oqarpoq.
Pituttortuunngilaq taanna isumaqatigiissut?
- Aappi, pituttortuunngilaq.
Assersuutigalugu nipisaat suaat pillugit akit appasigineqarpata taava isumaqatigiissut atorunnaarsinneqassaaq?
- Tassa taanna sulisitsisut immikkoortortaqarfiit (KNAPK, aaqq.) taanna aalajangerumaarpaat. Isumaqatigiissut aalaakkaasuuvoq, ilaasortat nipisaat suaasa akiinik isumaqataanngippata taava isumaqatigiissut qaammatit pingasut ingerlaneranni atorunnaarsinneqarsinnaavoq.
