Royal Greenlandip akerliussutsimik takutitsisut naapikkumanngikkai
![](/sites/default/files/styles/image_934x467/public/2024-04/434379517_1113855466370992_1295149671244539300_n.jpg?h=4c2f95b2&itok=NurvDuOF)
- Aqutsisutulli akerliussutsimik takutitsinut anillanniarnata aalajangerparput, sulisugullu KNAPK-p isornartorsiutaanut akisussaasuunngillat.
Royal Greenland KNAPK-p akerliussutsimik takutitsinissaa sioqqullugu tusagassiuutinut nalunaarummi allappoq.
Aalisartut kattuffiata oqarnera naapertorlugu Royal Greenlandip nipisaat suaasa akii – uteqqiasumik ajornartorsiutaasut pillugit oqaloqatiginnikkumannginnera pissutigalugu aalisartut ullumi akerliussutsimik takutitsiniarput.
Aalisakkerivissuulli akit isumaqatigiissutiginiarnagit aalajangiusimavaa.
- Ajoraluartumik oqaloqatigiinneq KNAPK-p akinik isumaqatigiinniarnermi pinngitsoornagu piumasaqaataa uaugut peqataaffigisinnaanngisarput pissutigalugu iluatsinngilaq, taakku allapput.
Orsussap akia aamma aalisarneq pillugu inatsisissaq
KNAPK-p kattuffittut pingaaruteqassusaa akuersaarlugu taamaammallu qanimut kinguneqartussamillu isumaliulernissamut suleqatigiinnissaq kissaatigalugu Royal Greenlandip paasissutissiisutigaa.
Royal Greenlandip tusagassiuutinut nalunaarutaa naapertorlugu KNAPK-p Royal Greenlandillu akornanni ilaatigut pisassiissutinik ingerlatsinermut tunngatillugu suleqatigiinnissamut nutaamik isumaqatigiissuteqarnissaq pillugu siornali ataatsimiittarlutik KNAPK-lli akinut atatillugu isumaqatigiinniarnermi piumasaqaataa suleqatigiinnermut akornutaavoq.
Taamaammat Royal Greenlandimi aqutsisut akerliussutsimik takutitsisut naapinnianngilai.
Ullumikkulli akerliussutsimit takutitsineq nipisaat suaannut kisimi tunnganngilaq, taamaammat aamma Royal Greenlandimuinnaq kisimi akerliussutsimik takutitsisoqarani. Aalisartummi KNI-p orsussamut 60 øremik qaffaanera ilaatigut aamma kamaatigaat.
Kiisalu aalisarneq pillugu inatsisissaq utaqqineqartuartoq Inatsisartuni ullumi aamma oqaluuserineqassaaq, taamaammat akerliussutsimik takutitsisut aamma Inatsisartut saannukassapput.