Akerliussutsimik takutitsisut qanitik nipittartulerlugit allagartanillu tigumiarlutik Tasiilami ingerlaarput
Sapaammi inuit 600-t missaanniittut allagartanik namminneq sanaaminnik tigumiarlutik Tasiilami ingerlaaqatigiipput. Allagartat ilaanni “Naammaleqaaq!” aamma “Silenced” (nipangersitat, aaqq.) allassimapput, inuillu arlallit qanitik nipittartulersimavaat.
Akerliussutsimik takutitsisut politikkikkut eqqumanerusoqarnerulernissaa suaartaatigaat. Illoqarfimmi nunaqarfinnilu eqqaaniittuni, katillugit 2500-nik inulinni, ajornartorsiuterpassuit atugaapput.
Angallannermi pissutsit ajornerat, internetimut attaveqarnerup ajornera, meeqqat atuarfiini ilinniartitsisunik amigaateqarneq, inissaaleqineq suliffissanillu amigaateqarneq ajornartorsiutit ilaannarigaat, akerliussutsimik takutitsinermik aaqqissuusseqataasoq Iddimanngiiu Jensen Bianco oqarpoq.
- Tamakku kingulliunneqartarnermit malittaapput. Illoqarfimmi ineriartortoqanngilaq, taanna oqarpoq.
Tamannalu akerliussutsimik takutitsisut allanngortinniarpaat.
Iddimanngiiu Jensen Bianco naapertorlugu akerliussutsimik takutitsineq takkuttorpassuaqarluni iluatsilluarpoq.
- Peqataasut amerlaqaat, amerlasuullu isummatik tusartippaat, taanna oqarpoq.
Pimoorunneqartariaqartoq
Tunumi pissutsinik pakatsissuteqartut ilagaat Mike Nicolajsen. Taanna Tasiilami Hotel Angmassalimmik piginnittuuvoq.
- Naammaleqaaq. Tunumik mattussineq kissaatiginngilarput, ineriartortitsisoqarnissaali kissaatigaarput. Uaguttaaq maaniinnerput ersersittariaqarparput, KNR-imut siornatigut oqarpoq.
Oqariartuut Nuummi tusarneqarpoq. Sermitsiaq naapertorlugu akerliussutsimik takutitsineq tapersersorniarlugu inuit 80-t 100-llu akornanni amerlassusillit Inatsisartut saavaniipput.
Aamma naalakkersuisut siulittaasuat Jens-Frederik Nielsen (D) Inatsisartut saavaniippoq, akerliussutsimillu takutitsisut oqariartuutaat paasilluarsinnaavaa.
- Oqariartorneq asuliinnaanngilaq. Nunatta kangiani ineriartornerup arriippallaarnikuunera ilumoorpoq, tamannalu iliuuseqarfigineqartariaqarpoq. Naalakkersuisuusugut pimoorutivissorlugu iliuuseqarfigisariaqarparput, naalakkersuisullu isumaqatigiissutaat qiviaraanni, ajunngitsut ineriartuutissallu arlallit suliarinikuuavut, pimoorullugillu taakku suliarerusuppavut, oqaluinnarneq naammassanngimmat, Sermitsiaq naapertorlugu Jens-Frederik Nielsen oqarpoq.
Aammattaaq Tunumi attaveqaatit pitsaanerulernissaat, aalisarnerup ineriartortinnissaa suliffissanillu amerlanerusunik pilersitsinissaq Naalakkersuisut pingaartikkaat taassuma erseqqissarpaa.
Iddimanngiiu Jensen Biancolu aperigaanni neriuutissaqarpoq.
- Pisoqartuuppat qujamasuutigissavarput. Suut tamarmik ingerlaannaq aaqqinneqarsinnaanerat takorluunngilarput, kisianni Tunumi pitsaanerusumik ineriartortitsinissaq ujartorparput, taanna oqarpoq.
