Naja-Nuka Jensen qulingiluanik ukiulik tv-kkut aallakaatitassiami nunat tamalaaneersumi peqataasoq

2023-mi januarimiit aprilip tungaanut Naja-Nuka Jensenip atuarnini Litauenimi Finlandimilu filmilortarfimmik taarserallarpaa. 

Tamannami sioqqullugu tv-kkut nangeqattaartuliami Smilla’s Sense of Snow-imi, atuakkiortup Peter Høeghip atuakkiaa Frøken Smillas fornemmelse for sne (1992) tunngavigalugu suliarineqartumi, peqataasussatut toqqagaasimavoq.

- Toqqagaanissara naluara, Naja-Nuka Jensen oqarpoq.

Naja-Nuka Jensenip inuppassuit akornanni filmiliorluni inissisimaffimmeeqataaneq nuannarivaa. Tamanna misileqqinnissaa neriuutigivaa.     Assi © : KNR

TV-kkut nangeqattaartuliaq Australiami 30. juli takuteqqaarneqartoq, Smillamut 37-nik ukiulimmut tunngavoq. Taassumap sanilia, Inuttut nagguilik, nassuiaruminaatsumik toqunerata kingorna toquneralu politiiniit soqutigineqarpasinnani ajutoornertut naliligaammat, Smilla nammineq paasiniaalerpoq.  

Naja Nuka Jensen nangeqattaartuliami pingaarnertut inuttap, Smillap, meeraanera inuttaaffigaa.

Tv-kkut filminilu immiussinermiit nalunnginneqartutut, trailerini pinnersaasoqarlunilu nujalerisoqarpoq. Aajunalu Naja Nuka Jensen taamaattup iluaniittoq.  Assi © : Privatfoto

Naja-Nuka Jensen isiginnaartitsisartutut misilittagaqarsimanngilaq, taamaattumik tv-iliorferujussuarmi peqataanini misigisaq nuannersuunerarpaa. 

- Apuukkaangatta traileriliaqqaartuaannarpugut COVID-19-imut misissugaalluta. Napparsimanngikkaangatta pinnersartikkiartorniarluta, nujalerisikkiartorniarluta atisalersuisartuniillu atisalersortikkiartorluta trailerimut allamukartarpugut. Taava pinngualaartarpunga - ilaannikkut aamma mamakujuttunnattarpugut, oqarpoq. 

Misiliisorpassuit akornanni toqqagaasoq

Naja-Nuka Jensen Smilla meeraanerani inuttassatut toqqagaannginnermini - meeqqat allatulli - tuluttoornermi angusiffissamik misilitsissimavoq.  Tamannali qulingiluanut ukiulimmut ajornarsimanngilaq.  

– Tuluttut ilikkareernikuugama. Atuartorujussuullungalu. Kukkugaanni ajunngilaq, ilami tuluttut oqalussinnaavunga, oqarpoq. 

Ukiup affaa misilitsitsisoqareersorlu Naja-Nuka Jenseni isiginnaagassiami inuttaasussatut toqqagaavoq. 

Naja-Nuka Jensenip inuttaasussatut toqqarneqarnini tupaallaatigivaa. Pikkorinnerartipporlu.  Assi © : SBS

- Meerarpassuit akornanni toqqagaavunga oqarfigineqarpungalu pikkorittunga filminilu nangeqattaartulianilu allani immaqa peqataasinnaasunga, oqarpoq. 

Naja-Nuka Jensen immiussinerit nalaanni filmimi angajoqqaarisuusaakkani, Nive Nielsenimiit kalaaliusumiit Morten Suurballemiillu qallunaamiit inuttaaffigineqartut, qanillivai. 

- Filmimi taakku angajoqqaaraakka kammagiillualerpugullu, oqarpoq. 

Ataatsimut isigalugu, Naja-Nuka Jenseni immiussinerit nalaanni inuppassuit isumassarsiffiginartut naapissimavai.

- Inuppassuit ilikkagaqarfigivakka. Inuit filminiit allaniit nalunngisakka - inuit nunanit allaneersut. Ataaseq filmimi  ”Game of Thrones”-imi ikiunnikuusimannguatsiarpoq, taanna oqarpoq.

Tv-kkut nangeqattaartuliami peqataareernermi kingorna, siunissami isiginnaartitsisartuunissani takorloorpaa.

- Neriuppunga. Ilami nuannisarnermik, taanna oqarpoq. 

Smilla's Sense of Snow australiami isiginnaarfikkut SBS isiginnaarneqarsinnaavoq. Viaplayimiilerumaarpoq aamma - aaquguminngaanniilli tamanna pissanersoq suli ulluliiffigineqanngilaq. Tv-kkut nangeqattaartuliamit naalisaalluni takusassiaq takuneqarsinnaavoq uani.