Arsaannermi ilisimasalik: Inuusunnerusut akisussaaffimmik tigusineq ilikkartariaqarpaat

Angutit inersimasut arsaannermi pissartanngorniunnerat ukioq manna pisinnaajunnaartunit eqqugaavoq aammalu anngunniunnissanut nalunaartut ikinnerullutik.

Arsaannermi GMip naggataarneqarnera maanna pisussanngorpoq iligiit arfinillit peqataasoralugit pilersaarutit siulliit malillugit iligiit arfineq pingasuusussaagaluartut.

Ukiorpassuarni sungiusaasuullunilu arsaattartoq Nukannguaq Zeeb Qeqertarsuarmeersoq maluginiagaqarpoq pissutsit tamaanga killikkiartornera ukiut kingulliit malunnarsimavoq. Maannalu ajornartorsiut malunnarsivippoq.

- Maluginiakkama ilagivaat ullutsinni inuusunnerusut arsaannermut tunniusimanerat uagut nalitsinnut uagullu sioqqulluta arsaattartuusunut sanilliullugu sakkukinnerusoq, Nukannguaq Zeeb oqarpoq, nangillunilu:

- Utaqqiinnarneq allanillu akisussaatitsiniartarneq takussaanerulernikuuvoq. Isumaqarpunga maanna arsaannermi GM-mi ajornartorsiutaasumut tamanna aallaavioqataasorujussuusoq.

Nukannguaq Zeebillu erseqqissarpaa nammineq isummani uani annillugu.

Inuiaqatigiit akisussaaffiat

Taanna aamma isumaqarpoq ajornanngippallaartoq akisussaaffik arsaattartut kattuffiannut KAK-mut tutsiinnassallugu. Taassuma isumaa malillugu akisussaaffik inuiaqatigiinni siammasinnerusumik inissisimavoq.

Angajoqqaat, atuarfik, meeqqeriviit ilaqutaasullumi akisussaaqataasut isumaqarpoq.

- Isumaqarpunga inuiaqatigiittut aaqqissuussaanerput pissutaaqataasoq. Assersuutigalugu ajornanngitsunnguamik ikiorsiissutinik tunniussisoqartarpoq. Tamanna akisussaaffiiaaneruvoq, Nukannguaq Zeeb oqarpoq.

Pissutsit illuanut saatinniassagaanni iliuuseqarfissat arlalissuunerarpai aammalu utaqqikatannaversaartoqartariaqarnerarlugu.

Assoralineq ilikkarlugu

- KAKp iliuuseqarnissaa utaqqiinnarsinnaanngilarput. Uagut nammineq illoqarfigisatsinni arlaatigut iliuuseqartariaqarpugut. Inuusuttut akisusaaffimmik tigusisinnaanissaannut peqatigiiffiit ilinniartitsisariaqarput, Nukannguaq Zeeb oqarpoq, nangillunilu:

- Inuusuit qanoq iliussappat assersuutigalugu ukiut qulit qaangiuppata Qaqortumi GM-rtoqaqqissappat? Arlaannik aporfeqassagaluarpat tamatuma qaangeriarnissaanut inuusuttut piareersartariaqarpagut.

Arsaannermi GM sisamanngorpat nalunaaqutaq 15.00 aallartissaaq.