Ittoqqortoormiit arsaannermi GM-qataassanngillat: Timmisartuutileqatigiit assigiinngitsut pingasut aqqusaaqqaassagaluaramikkit
AK Ittoqqortoormiit arsaattartut kattuffiannut KAK nalunaarpoq Qaqortumi GM-rtoqarnissaanut peqataasinnaajunnaarlutik.
AK Ittoqqortoormiineersoqq Kristian Hammeken KNR-mut taama ilisimatitsivoq.
- Siulersuisut AK Ittoqqortoormiit sinnerlugu ajoraluartumik KAK-mut nalunaarput GM-mut peqataasinnaajunnaartugut, Kristian Hammeken oqarpoq.
Arsaannermi GM-rtoqarnerani siullerpaamik Ittoqqortoormiit peqataatitaqartussanngoraluarput maannanut Nunatta kangia sinnerlugu Tasiilarmiut eqqaamiuilu peqataasareersut.
GM-mulli ullut pilersaarutaasut Ittoqqortoormiiniillu angalanissamut periarfissat ataqatiisinneqarsinnaasimanngillat.
Soorlu Nunatta avataaniilluni
Ittoqqortoormiiniit angalanissaq tulleq aatsaat augustip 15-at pisinnaavoq ullorli taanna GM Qaqortumi naggataarneqartussaalluni.
- Ittoqqortoormiiniit angalanissamut periarfissatuarput tassaavoq Islandiliaqqaarluta timmisartuutileqatigiillu assigiinngitsut pingasut aqqusaaqqaarlutit Qaqortumut apuussinnaalluta, Kristian Hammeken oqaluttuarpoq.
- Ittoqqortoormiineersunut pissutsit taamaapput. Angalanissat eqqarsaatigalugit Ittoqqortoormiit Nunatta avataaniittutut ippoq, eqikkaalluni oqarpoq.
Siullerpaamik peqataasussanngorneq arsaattartunut Ittoqqortoormiineersunut misigisatsialaasussaagaluarpoq.
- Arsaattartuutinnguavut GM-mi peqataanissamut qilanaarimagaluaqaat pikkorissunut unamissagamik. Isumaqatigiikkaluarpugut ataasinnguamilluunniit isertitsisinnaagutta nuannaarutigissallugu, Kristian Hammeken oqarpoq.
AK Ittoqqortoormiit aamma KAK-mut qujassuteqarput GM-mi peqataanissamut periarfissinneqarsimgaluaramik. Aammattaaq GM-mi peqataasussanngoraluarnermi nunaqqatigiit tapersersuilluarnerat qujamasuutigaat.
AK Ittoqqortoormiit puljeqatigigaluarpat siorna pissartat Nagdlúnguak Ilulissaneersut, K-33 Qaqortoq aamma IT-79 Nuummeersoq.
Eqaluk 54 Tasiusameersoq maanna Ittoqqortoormiormiut sinnerlugit peqataasussanngorpoq.