Trump: Charlie Kirki naakkittaatsumit toqutaavoq

Isummaminik siammarteriniartumut toqutaasimasumut Charlie Kirkimut eqqaaniaalluni malunnartitsiniartoqarnerani oqalugiartut akornanni, USA-p præsidentiata Donald Trumpip, toqutsisoq kisiartaalluni eqqaavaa.

Taama allappoq Amerikami tusagassiorfik CNN.

USA-mi naalagaaffiup immikkoortuani Arizonami aaqqissuussinermi amerikarmiut titusindillit talerperlernik isumaqartunik akerlilersuisoq Charlie Kirk eqqaaniarpaat.

Trumpip oqalugiarnermini Kirk ingasattajaartumit peqqarniitsumiillu toqutaasimanerarpaa.

- Kiffaanngissuseq naapertuilluassuserlu, Guuti, nuna, silappaarissuseq silaqassuserlu pillugit oqalummat peqqarniitsumik toqutaavoq, Trump oqarpoq.

Evangelisti annerpaaq

31-nik ukiulik Charlie Kirk Utah Valley Universitymi aaqqissuussinermi oqalutsilluni sapaatip akunnera kingullermi pingasunngornermi allaaneqarluni toqutaavoq.

22-nik ukiulik Tyler Robinson tigusarineqarpoq aallaammillu issussisimasutut unnerluussalluni. Trumpilli oqalugiarnermini Robinson aqqatigut taanngilaa. 

Præsidentip Kirk amerikamiut kiffaanngissuseqarnissaannut evangelisti annerpaatut oqalugiarfimmiit taavaa

- Arlaannattaluunniit Charlie Kirk qaqugumulluunniit puigornavianngilaa, oqaluttuarisaanermi aamma puigorneqarnavianngilaq.

Trumpi naapertorlugu Charlie Kirkip akerlerisani uumissunngilai - ajunnginnerpaamilli kissaattarpai.  

- Tassuuna Charlie isumaqatiginngilara. Uanga akerlerisakka uumissorpakka. Aamma ajunnginnerpaamik kissaanneq ajorpakka, Trumpi BBC naapertorlugu oqarpoq, taamatullu oqarnera isiginnaartunik illariartitsillunilu qiimmattaatigineqarpoq. 

Eqqaaniaaneq amerikamiut arsaattarfianni State Farm Stadiumimi ingerlanneqarpoq, inunnik 60.000-nik ikinnerunngitsunik isiginnaariarfigineqarsinnaasumi.

Charlie Kirkip uillarnera, Erika Kirk, Trumpip oqalugiannginnerani tusarnaartunut oqalugiarpoq.

Aamma taassumap pinerluttoq eqqaavaa isumakkeerfiginerarsimallugulu, tamannalu pillugu  isiginnaartut nikuillutik ersaartaassimasut, CNN allappoq.

/ritzau/