Naalagaaffimmi unnerluussisussaatitaasup Charlie Kirkimik toqutsisoqarnerani toqumik pillaatisisoqarnissaa anguniaraa

USA-mi Utahimi naalagaaffiup unnerluussisussaatitaasuata Charlie Kirkimik toqutsisimasutut pasisaq toqumik pillagassanngortinniarpaa.

Taama oqarpoq unnerluussisussaatitaasoq Jeff Gray, marlunngornermi tusagassiortunik katersortitsinermi.

Toqutsisutut pasineqartoq Tyler Robinson ilaatigut piaaraluni toqutsisimasutut ilisimannittunillu sunniiniartutut unnerluutigineqartoq aamma oqaatigineqarpoq.

Robinsonip allakkat imminut unnerluutiginnissutaasinnaasut peeqqullugit najugaqatini qinnuigisimagaa unnerluussisussaatitaasumit erseqqissarneqartoq, nutaarsiassaqartitsivik Reuters paasissutissiivoq.

Aviisi The New York Times naapertorlugu unnerluussisussaatitaasup pinerluuteqarsimasutut pasisap taassumalu najugaqataata allaqatigiinnerat unnerluussissummi allaaseraa.

Unnerluussisussaatitaasoq naapertorlugu Robinsonip allaqateqarnermini aallaasersorsimanini nassuerutigaa.

- Uumissuinera naammagilerpara, Robinsonip najugaqatini Charlie Kirk pillugu allaffigisimavaa.

Pasilliutit arfineq-marluk

Aammattaaq allakkami ilaanni Robinson oqaluttuarpoq USA-mi præsidenti Donald Trump præsidentitut qinigaaqqimmalli ataataasoq „MAGA-mik tapersersuisorujussuusimasoq“.

MAGA-p isumaa tassaavoq „Make America Great Again“, Trumpillu oqariartuutaatut qangali ilisimaneqarpoq.

Unnerluussissut naapertorlugu pinerluuteqarsimasutut pasisap anaanaata, Robinson ukiumi matumani - ataatami iliuusaata muminganik - saamerlerniittut eqqarsartariaasaannut sammineruleraluttuinnarsimasoq aammalu inunnguuseralugu suiaassutsiminnik allannguerusuttut suiaaqatigiillu pisinnaatitaaffiinik ukkassinerulersimasoq. 

Robinsoni katillugit pisunut arfineq-marlunnut pasillerneqarsimasoq, CNN-ip nalunaarutigaa

Pinerlunnerit taakkua ilagaat piaaraluni toqutsineq, misissuinermik marloriarluni akornusersuineq,  unioqqutitsilluni aallaammik aallaaneq inummik ajoqusiinermik kinguneqartumik, ilisimannittunik marloriarluni sunniinerit meeqqallu eqqaani nakuusernertalimmik pinerlunneq.

Marlunngornermi unnukkut eqqartuussinermi, eqqartuussisup Tony Grafip pasilliutaasut atuarpai. Unnerluussisussaatitaasup Chad Grunanderip tassani uppernarsarpaa toqumut pillaasoqarnissaa piumasarineqartoq.

Robinson videokkut eqqartuussinermut peqataavoq.
BBC-p oqaluttuaraa Robinsonip nujai naatsuusut, tujuulullu qorsuk aaqanngitsoq atoraa.

BBC naapertorlugu eqqartuussivimmi eqqartuussissuserisoq oqarpoq Robinsonip eqqartuussissuserisumik pissarsinissaa sulissutigineqartoq, maannalu suli pissarsisimagunanngilaq.

Talerperlerni ilungersuullugu suliniuteqartartoq Charlie Kirk 31-nik ukiulik, Utahimi sapaatip-akunnerani kingullermi pingasunngornermi ataatsimeersuarnermi aallaaneqarpoq.

/ritzau/