Kommune Kujalliup iikkat kumaasa siaruaannerat mianersoqqussutigigaa

Nanortalimmi innuttaasut iikkat kumaanik akiuiniarnermi ikiuunnissaat pisariaqarpoq.

Sullinerit ilaat kumak aammik milluaasartoq Nanortalimmi massakkut ‘siaruartingaatsiartoq paasineqarpoq’:

- Ajornartorsiut maanna illoqarfimmi inuit angerlarsimaffiini, inunnik sullissiveqarfinni illunilu allani takussaalerpoq, kommune tusagassiuutinut nalunaarummi allappoq.

Illoqarfimmi innuttaasut kisimik pineqanngillat. Kommune Kujalliummi iikkap kumaata illoqarfiup killeqarfiinut allanut siaruarternissaa ernumassutigaa:

- Iikkat kumaat Kommune Kujallermi siaruaateratarsinnaapput Nunattalu sinneranut aamma siaruaateratarsinnaallutik.

Qisuariaateqapallagit

Iikkat kumaqartut paasineqarpata qisuariaateqartoqapallassasoq, kommune allappoq. Tamanna siaruartertoqarneranut unitsitsissutaaqataasinnaavoq.

Kommunip iikkat kumaat eqqiluisaannginnermut imaluunniit eqqiaasannginnermut attuumassuteqanngitsut ilanngullugu paasissutissiissutigaa:

- Iikkat kumaat eqqiluisaannginnermut eqqiaasannginnermulluunniit attuumassuteqanngillat. Angerlarsimaffinnik tamanik eqquisinnaapput, taavalu atisat, taskit, nassatat, peqqutit allallu inuit pigisaat aqqutigalugit siaruassinnaallutik.

Iikkat kumaqartut paasigaanni inuppassuarnut attaveqarnaveersaartoqassaaq, illoqarfinnut nunaqarfinnullu allanut angalanaveersaartoqassaaq. Iikkat kumaat tamatuma saniatigut pequtit atornikut aqqutigalugit aamma siaruartertarput.

- Pequtit atornikut, tunissutisiatit allanilluunniit pisiatit mianersuutikkit, kommune ilaatigut siunnersuuteqarpoq.

Angerlarsimaffinni iikkat kumaqartut paasigukku attartorfinni inissiaatileqatigiiffimmulluunniit attaveqassaatit. Tassannga ajornartorsiutip qaangernissaanut eqqiaanissamut errorsinissamullu siunnersorneqassaatit.

Kommune Kujallermit iliuuseqarnissamut malittarisassat uani annerusumik atuarsinnaavatit.