Nukissiorfiit Ameraliup kangerluanut angallannerup killilerneqarnissaa nalunaarutigaa
Nuup kujataanut Ameraliup kangerluanut aggustip pingajuata 17-iata akornanni angalassaguit eqqumaffissaqarputit.
Kangerlummummi angalaneq piffissami tassani killilerneqassaaq. Nukissiorfiit tusagassiuutinut nalunaarummi allapput.
Nukissiorfiit Utoqqarmiut Kangerluarsuannguannit Nuummut innaallagissamik pilersuissummik kangerluk ikaarlugu iluarsartuussinermik suliaqangaatsiarnissaat pissutaavoq.
Tamanna wirerersuit ikkussat sisamat 2024-mi decembarimi ajoquserneqarneranik pissuteqarpoq. Nuuk ajoqusertoqarnerata nalaani akunnerit qulit sinnerlugit innaallagiaqanngilaq.
Wirerersuit ikkussat sisamaat Nukissiorfiit Nuummut erngup nukinganik nukissiorfimmit pilersuinermi sillimatigaat.
Nunarsuarmi takinerpaaq
Nukissiorfiit oqarnera naapertorlugu wirerersuit allat ajoqusissagaluarpata Nuummut erngup nukinganik nukissiorfimmit pilersuisoqarnissamut periarfissaqarunnaassaaq. Taamaattoqassagaluarpallu illoqarfiit pingaarnersaannut innaallagissiorfik dieselimik ingerlateqartoq kisimi periarfissaalissaaq.
Taamaammat sillimmatimik nutaamik pilersitseqqinnissamut suliaqarneq aggustimi aallartinneqarpat tamanna Nuup innaallagissamik siunissamik pilersugaanissaanik qulakkeeriniarnerussaaq.
Nukissiorfiit Amerlalik ikaarlugu ikkussaq nunarsuarmi wirerersuit takinersarigaat aamma allappaat. Taamaammat wirerersuarmik taarsiinissaq suliassarujussuuvoq, tamannalu nunatta avataani suleqatigisat immikkut ilisimasallit suleqatigalugit suliarineqassalluni.
- Ameraliup matoqqagallarnissaa piniartunut angallattunullu akornusersuisinnaanera eqqumaffigaarput, suliarli ulluni pineqartuni naammassiniarneqassaaq, taamaalinerani sila atoruminarnerusarmat suliffeqarfiillu suleqatigisat nunatta avataaneersut ulluni taakkunanerpiaq suliamik ingerlatsisinnaammata. Nukissiorfiit tusagassiuutinut nalunaarummi allapput.
Nukissiorfiit innuttaasut isumannaannissaat pissutigalugu killilersuinerit malinneqarnissaat pingaaruteqartoq ilanngullugu allappaat.
Kangerluup qaqugu angallaffigineqarsinnaannginnera pillugu Nukissiorfiit nittartagaatigut paasissutissarsisoqarsinnaavoq.
